- QR Aýyl sharýashylyǵy ministrligi Veterinarlyq baqylaý jáne qadaǵalaý komiteti tóraǵasynyń mindetin atqarýshy Tursyn Qabdoldanov kiikterdiń arasynda jańa virýstyń taralýyn joqqa shyǵaryp otyr, dep habarlaidy QazAqparat.
«Kiikterge qatysty máseleniń barlyǵy orman sharýashylyǵynyń quzyrynda. Veterinarlyq baqylaý jáne qadaǵalaý komitetiniń arasynda memorandým bar. Soǵan bailanysty monitoring júrgiziledi. Búgingi tańda kiikterdiń arasyndaǵy epizootikalyq jaǵdai birqalypty. Ǵylymi turǵydaǵy jumystyń resmi málimeti berilgen emes. Qazir Qazaqstan aýmaǵynda 108 myńnan astam kiik bar. Jańa virýs týraly resmi aqparat joq. Tekserý júrgizilgen. 2013 jyly pasterellez shyqqan. Odan basqa virýs anyqtalmady. Búginde el aýmaǵy kiikterdiń aýrýynan taza» - dedi T.Qabdoldanov QazAqparat tilshisine bergen suhbatynda.
Aita keteiik, jaqynda Biologiialyq qaýipsizdik problemalary ǵylymi-zertteý institýtynyń ǵalymy, akademik Abylai Sansyzbai kiikterdiń arasynda jańa virýstyń taralyp jatqanyn málimdedi. «Jańa virýstyń ataýy - Akabane. Osy ýaqytqa deiin atalǵan virýs Qazaqstan territoriiasynda bolmaǵan. Ǵalymdar kiikterdiń 12 paiyzynda Akabane virýsyn taýyp aldy. «Bul aýrýdyń ýshyǵyp ketýi kiikter sanynyń kúrt qysqarýyna ákelip soqtyrýy ábden múmkin. Sondyqtan tiisti sharalardy qolǵa alý qajet», - dedi akademik Sansyzbai.
