Byltyr qysta Astanada «jyly aialdamalar» tóńireginde shý shyqty. Jergilikti bilik bir avtobýs aialdamasyna bálen million aqsha jumsaǵan. Bul ysyrapshyldyq jurtshylyqtyń jaǵasyn ustatty. Áitse de, jabyq pavilondar qalanyń barlyq jerinde ornatyldy. Jalpy sany – 27. Biraq bul maqsatqa qansha qarajat bólingenin jáne keiingi aialdamalardyń baǵasy týraly bilik tis jarmaýdy jón kórdi. Jobalyq smeta qujattaryn da kórsetpedi. Dei turǵanmen, Astana ákimdigine qaita-qaita suraý salyp, qalalyq qoǵamdyq keńestiń aralasýymen, áiteýir, qansha aqsha jumsalǵanyn bildik.
Alǵashqy jabyq pavilon Astanada byltyr qazan aiynda ornatyldy. Jergilikti biliktiń bul bastamasyna elordanyń aiazy men jelinen búrseńdeitin turǵyndardyń qýanǵany ras. Jabyq aialdamanyń ishi jyly, buǵan qosa ol beinebaqylaý jáne Wi-Fi júiesimen jabdyqtalǵan. Avtobýstardyń baǵdaryn kórsetetin aqparattandyrý júiesi de bar.
Osylaisha jap-jaqsy bastalyp edi, biraq sońy daýǵa ulasty. Óitkeni bir aialdamaǵa 10 mln teńge jumsalypty. Jurtshylyq bul tym qymbat desti. Tipti reseilikter de bul baǵaǵa tańǵaldy. Máselen, Krasnoiarde osyndai bir aialdama áldeqaida arzanǵa túsken. Biraq avtobýs pavilondaryn qoiǵan «Astana LRT» JShS-niń mamandary ekeýin sapa jaǵynan múldem salystyrýǵa bolmaidy dep shyr-pyr boldy. Osy kezde jyly aialdamany 5 mln teńgege ornatyp berýge daiyn kompaniialar da tabyldy.
Saiyp kelgende, kópshiliktiń oiy aialdama qunyn qaita esepteý qajet degenge kelip toǵysty. Solai jasalǵan da siiaqty. Qalalyq ákimdikten surap alǵan málimetke súiensek, jyly aialdamalardy salýǵa 199,8 mln teńge qarjy bólingen. Jalpy, ótken qysta qala boiynsha 27 avtobýs pavilony ornatyldy. Alǵashqysynyń quny - 10 mln teńge. Endi ózimiz eseptep kóretin bolsaq, keiingi aialdamalardyń árbireýine shamamen 7 million 300 myń teńge jumsalǵan.
«Jyly aialdamalardyń quny jobalyq smeta qujattaryna sáikes anyqtaldy. Atap óterlik jait, 2015 jyldyń jeltoqsan aiynda Astana qalasy prokýratýrasy atqarylǵan jumys kóleminiń naqty sáikestigin tekserdi. Alynǵan taýarlardyń quny jáne jasalǵan qyzmet aqysy tolyqtai óteldi, eshqandai zańbuzýshylyq anyqtalmady», - dep jazylǵan Astana qalasy jolaýshylar kóligi basqarmasynyń jaýabynda.
Astanada barlyǵy 82 osyndai aialdama ornatýjosparlanǵan. Sonda áli 55 pavilon kerek. Az qarajat emes. Sondyqtan biýdjet júgin jeńildetý úshin kólik infraqurylymy jobalaryna investorlar tartylmaqshy. Qazirgi ýaqytta kompaniialarmen kelissózder júrgizilip, jobalyq-smetalyq qujattar daiyndalyp jatyr. Sonyń nátijesinde qurylys quny anyqtalmaq.
