Búrkit eskertkishiniń biiktigi - 3 metr, qanatyn jaiǵanda eni - 7 metr bolady. Bul músindi jasaýǵa 1999 jylǵy mektep túlekteri qarjy bóldi, dep habarlaidy QazAqparat tilshisi.
Aqtóbe oblysy Muǵaljar aýdany Qudaibergen Jubanov aýyldyq okrýginiń mektebin bitirgen túlekter týǵan aýylyna alyp búrkit eskertkishin syilady. Aýyl halqy da kómektesip, nysandy týrizmdi damytýdyń bir kózine ainaldyrýdy maqsat etip otyr.
«Buǵan deiin de aýylda búrkittiń eskertkishi boldy. 80-jyldary ornatylǵan músin shógip, qanaty qaiyrylyp, úgitile bastaǵanda qaita jańartylǵan, biraq buzylyp qaldy. Sýretshi Murat Nábievke usynys berip, qaita qalpyna keltirý usynysyn aitqan edim, biraq músin jaramsyz boldy. Jyl basynda 1999 jylǵy mektep túlekteri aýyl ákimdigine habarlasyp, «Týǵan jerge taǵzym» aktsiiasymen kómek beretinderin aitty. Osy ideiany usynǵan kezde birden qoldady. Armatýra, metall torlar men tsementti túlekter alyp berdi. Tuǵyryn daiyndaý, búrkittiń músinin jetkizý jumystaryna aýyl turǵyndary kómektesti. Al aýdan ákimdigi búrkitti ornatýǵa kran berdi», - deidi Qudaibergen Jubanov atyndaǵy aýyldyq okrýgtiń ákimi Kamshat Ermaǵambetov.
Búrkit músininiń biiktigi - 3 metr, tuǵyrymen eskertkish 4 metr boldy. Al qanatyn jaiǵan qustyń eni 7 metrge jetedi. Eskertkishtiń jalpy salmaǵy - 5 tonna.
«Aýylda Orqash tabiǵi qoryǵy bar. Týrizmdi damytýǵa yńǵaily ormanda jyrtqysh qustyń 9 túri bar. Olar: qara kezquiryq, kádimgi tilemish, jamansary, dala qyrany, betqainar, saz quladyny, shalǵyn quladyny jáne kádimgi kúikentai. Qoryq Or, Jem jáne Temir ózenderi aýdandarynda ornalasqan. Qyzyl kitapqa engizilgen teńgejapyraq shyqshóbi bar. Sondyqtan, búrkit aýyldyń simvolyna ainalyp, 10 shaqyrym qashyqtyqqa eskertkish ornatyldy. Taiaýda respýblikalyq ańshylar men balyqshylar, saiatshylardyń simpoziýmy ótti. Sol úrdisti jalǵastyryp, ekotýrizmmen kiiz úi ornatyp, saýmal týr, jaiaý júrý týry sekildi birneshe baǵytty qamtyǵymyz keledi. Kásipkerlerdiń qyzyǵýshylyǵy artyp keledi», - deidi okrýg ákimi Kamshat Ermaǵambetov.
