QR Sybailas jemqorlyqqa qarsy is-qimyl agenttiginiń Parasattylyq departamentiniń direktory Daniiar Sabyrbaev biyl magistratýraǵa túsý úshin tapsyrylatyn emtihan kezinde qandai buzýshylyqtar tirkelgenin aityp berdi, dep habarlaidy QazAqparat.
«Magistratýraǵa tapsyrý protsesi aitarlyqtai synǵa toly boldy. Magistrant bolǵysy kelgender jappai telefondar men shpargalkalardy paidalanýǵa tyrysty. Eger biz aýditoriiaǵa kirer kezde baqylaýdy qolǵa almaǵanda... Tekseristiń nátijesinde ǵana bul zattardyń bári alynyp otyrdy. Bir ǵana mysal keltireiin: Aqtóbe qalasynda 120 úmitkerden 131 telefon tárkilendi. 12 úmitker sonda da báribir telefonyn alyp kirgen. Abitýrientter qurmetti áriptester, siz ben biz bitirgen ýniversitetterden shyǵyp jatyr. JOO-lar ókinishke qarai, jas býynǵa negizgi qundylyqtardy sińire almady. Osy tájiribeden túisingenimiz: bizdiń JOO-lar parasatty jastardy tárbieleý sekildi óziniń tarihi missiiasyn oryndaýdy qoidy», - dedi Daniiar Sabyrbaev búgin Ortalyq kommýnikatsiialar qyzmetinde ótken baspasóz máslihatynda.
Agenttik ókili taǵy birneshe mysal keltirdi. Onyń aitýynsha, monitoringtik toptardyń, agenttiktiń ókilderi emtihan tapsyrýshylardy baqylaýǵa belsene atsalysqan.
«Testileý kezinde 1021 adam aýditoriiadan shyǵaryldy. Salystyryp kórińiz, ótken jyly dál osylai 174 adam ǵana aýditoriiadan qýylǵan. Olardyń jumys nátijeleri joiyldy. Faktilerdi ataiyn: Aqtóbe oblysyndaǵy Jubanov atyndaǵy aimaqtyq ýniversitettiń túlekteri qataryndaǵy 42 adam ustalyp, anyqtalǵan chiterlerdiń (shpargalkamen nemese uialy telefonmen ustalǵandar, aǵylshynnyń «cheat» –«aldaý» degen sózinen) 93 paiyzyn quraǵan. Sol sekildi Almaty oblysyndaǵy Jetisý memlekettik ýniversitetinde ustalǵan chiterlerdiń 100 paiyzy da atalǵan ýniversitettiń túlekteri bolyp shyqty. S.Amanjolov atyndaǵy ShQMÝ-da da úmitkerlerdiń 33 paiyzy chiterler bolsa, Qostanai memlekettik ýniversitetinde 34 adam ustaldy. Bul – jalpy tapsyrýshylardyń 85 paiyzy. Jalpy, Qostanai oblysynda 40 adam aýditoriiadan qýyldy. Pavlodar oblysyndaǵy Toraiǵyrov atyndaǵy ýniversitette 51 chiter anyqtaldy. Almatyda Ál-Farabi atyndaǵy QazUÝ-da 61 adam (24 paiyzy), Qazaq ulttyq pedagogikalyq ýniversitette de 59 adam (24 paiyz)... Jalpy, Almaty qalasy boiynsha 251 adam aýditoriiadan shyǵaryldy. Mundai jaǵdai barlyq otandyq JOO-larda tirkeldi», - dedi Daniiar Sabyrbaev.
Agenttik ókili osyǵan bailanysty JOO basshylyqtaryna óz saiasattaryn qaita qaraýdy usynyp otyr.
Eske sala ketsek, buǵan deiin Didar Smaǵulov osy jyldyń 10-15 tamyzy aralyǵynda magistratýraǵa túsý úshin ótkizilgen keshendi testileýdiń qorytyndysyn jariialaǵan bolatyn.
