Qazaqstandaǵy Sberbank biylǵy 12 shildege deiin kez kelgen operatsiiany júzege asyra alady. Bul týraly QR Qarjy naryǵyn retteý jáne damytý agenttiginiń tóraǵasy Mádina Ábilqasymova málim etti, dep habarlaidy QazAqparat.
«Sberbank máselesine toqtalsaq, 12 shildege deiin bul bank klientter úshin kez kelgen operatsiiany júrgize alady. Onyń ishinde shetel valiýtasyndaǵy operatsiialar da qamtylady», - dedi Ábilqasymova Májiliste tilshiler saýalyna jaýap bere otyryp.
Osy oraida agenttik basshysy atalǵan bank osy merzim aralyǵynda depozitter men zańdy ári jeke tulǵalardyń salymdaryn, shetel valiýtasyn basqa bankterge aýdara alatynyn aitty.
«Klienttiń ótinimi boiynsha salymdardy basqa bankke aýdarý múmkindigi jasalady, iaǵni osy operatsiialardyń barlyǵy oryndalady», - dep túsindirdi ol.
Onyń sózine qaraǵanda, al ulttyq valiýtadaǵy operatsiialar sanktsiialar engizilgennen keiin de iske asyryla beredi.
«Reseilik úsh bankten basqa qazaqstandyq bankterge qarajattyń qomaqty somada aýdarylýyn baiqadyq. Tiisti shekteýler bank qyzmetine aitarlyqtai yqpal etetinin túsine otyryp, Sberbank Qazaqstan men VTB banki menshik iesin aýystyrý úshin jańa investor izdep jatyr. Olar bankti ielenetin áleýetti investordy anyqtaǵannan keiin, QR Qarjy naryǵyn retteý jáne damytý agenttigi AQSh-tyń ókiletti organdarynan ruqsat alýǵa qoldaý kórsetedi, iaǵni sanktsiia tiziminen shyǵarý qadamdary júrgiziledi», - dedi Mádina Ábilqasymova.
