Endi álemdegi eń qart adam – 116 jastaǵy Tomiko Itooka. Ol 1908 jyly dúniege kelgen, al qazir Japoniiadaǵy qarttar úiinde turyp jatyr. Uzaq ómir súrýiniń qupiiasyn jaiaý serýender dep sanaityn áiel áli de anyq sóilei alady, dep habarlaidy "Ult aqparat".
116 jastaǵy Tomiko Itooka 117 jastaǵy Mariia Branias qaitys bolǵannan keiin álemdegi eń qart adam atandy. Ol 1908 jyly 23 mamyrda dúniege kelgen. Tomikonyń jasyn gerontologiia zertteý toby rastady.
Itooka qazir Japoniianyń Ashiia qalasyndaǵy qarttar úiinde turyp jatyr. Buryn eki qyzymen 110 jasqa deiin óz úiinde turǵan, 2019 jyly qarttar úiine kóship barǵan. Tomiko úsh ai buryn 116 jasyn toilady. Oǵan qala meri quttyqtaý hat joldaǵan. Qamqorshylarynyń aitýynsha, ol nashar estitinine qaramastan, áli de anyq sóilei alady.
Álemniń eń qart adamy Osakada úsh balanyń ortanshysy bolyp dúniege kelgen. Bastaýysh mektepten keiin Tomiko tek qyzdar oqityn orta mektepte bilim alǵan, sol jerde voleibolmen belsendi ainalysty. Ol 20 jasynda turmysqa shyǵyp, eki ul, eki qyz tárbielep ósirdi. Qazir onyń kóp nemere-shóberesi bar.
Ekinshi dúniejúzilik soǵys kezinde Tomiko kúieýiniń toqyma fabrikasyn basqarǵan. Jubaiy 1979 jyly qaitys bolǵannan keiin, ol Nara prefektýrasynda jalǵyz turǵan. Keiýana Nidjo taýyna shyǵyp turýdy unatqan. Sondai-aq ol 3000 metr biiktiktegi Ontake taýyn eki ret baǵyndyrypty.
Onyń uzaq ómir súrýiniń qupiiasy – uzaq jaiaý serýendeý, deidi onyń otbasy. Qazir Tomiko tarihta tirkelgen 24-shi eń qart adam. 20 tamyzda Ispaniiada 117 jastaǵy Mariia Branias qaitys bolǵan edi. Ol eki dúniejúzilik soǵys, ispan tumaýy, elindegi azamattyq soǵys pen koronavirýstan aman qalǵan adam retinde tirkelgen.
