ەندٸ ەلەمدەگٸ ەڭ قارت ادام – 116 جاستاعى توميكو يتووكا. ول 1908 جىلى دٷنيەگە كەلگەن, ال قازٸر جاپونيياداعى قارتتار ٷيٸندە تۇرىپ جاتىر. ۇزاق ٶمٸر سٷرۋٸنٸڭ قۇپيياسىن جاياۋ سەرۋەندەر دەپ سانايتىن ەيەل ەلٸ دە انىق سٶيلەي الادى, دەپ حابارلايدى "ۇلت اقپارات".
116 جاستاعى توميكو يتووكا 117 جاستاعى مارييا برانياس قايتىس بولعاننان كەيٸن ەلەمدەگٸ ەڭ قارت ادام اتاندى. ول 1908 جىلى 23 مامىردا دٷنيەگە كەلگەن. توميكونىڭ جاسىن گەرونتولوگييا زەرتتەۋ توبى راستادى.
يتووكا قازٸر جاپونييانىڭ اشييا قالاسىنداعى قارتتار ٷيٸندە تۇرىپ جاتىر. بۇرىن ەكٸ قىزىمەن 110 جاسقا دەيٸن ٶز ٷيٸندە تۇرعان, 2019 جىلى قارتتار ٷيٸنە كٶشٸپ بارعان. توميكو ٷش اي بۇرىن 116 جاسىن تويلادى. وعان قالا مەرٸ قۇتتىقتاۋ حات جولداعان. قامقورشىلارىنىڭ ايتۋىنشا, ول ناشار ەستيتٸنٸنە قاراماستان, ەلٸ دە انىق سٶيلەي الادى.
ەلەمنٸڭ ەڭ قارت ادامى وساكادا ٷش بالانىڭ ورتانشىسى بولىپ دٷنيەگە كەلگەن. باستاۋىش مەكتەپتەن كەيٸن توميكو تەك قىزدار وقيتىن ورتا مەكتەپتە بٸلٸم العان, سول جەردە ۆولەيبولمەن بەلسەندٸ اينالىستى. ول 20 جاسىندا تۇرمىسقا شىعىپ, ەكٸ ۇل, ەكٸ قىز تەربيەلەپ ٶسٸردٸ. قازٸر ونىڭ كٶپ نەمەرە-شٶبەرەسٸ بار.
ەكٸنشٸ دٷنيەجٷزٸلٸك سوعىس كەزٸندە توميكو كٷيەۋٸنٸڭ توقىما فابريكاسىن باسقارعان. جۇبايى 1979 جىلى قايتىس بولعاننان كەيٸن, ول نارا پرەفەكتۋراسىندا جالعىز تۇرعان. كەيۋانا نيدجو تاۋىنا شىعىپ تۇرۋدى ۇناتقان. سونداي-اق ول 3000 مەتر بيٸكتٸكتەگٸ ونتاكە تاۋىن ەكٸ رەت باعىندىرىپتى.
ونىڭ ۇزاق ٶمٸر سٷرۋٸنٸڭ قۇپيياسى – ۇزاق جاياۋ سەرۋەندەۋ, دەيدٸ ونىڭ وتباسى. قازٸر توميكو تاريحتا تٸركەلگەن 24-شٸ ەڭ قارت ادام. 20 تامىزدا يسپانييادا 117 جاستاعى مارييا برانياس قايتىس بولعان ەدٸ. ول ەكٸ دٷنيەجٷزٸلٸك سوعىس, يسپان تۇماۋى, ەلٸندەگٸ ازاماتتىق سوعىس پەن كوروناۆيرۋستان امان قالعان ادام رەتٸندە تٸركەلگەن.
