Sýret: unsplash
11-15 jastaǵy jasóspirimderdiń 10 paiyzy turaqty túrde veip shegedi. Bul derekti Úkimet otyrysynda Densaýlyq saqtaý ministri Ajar Ǵiniiat aitty, dep habarlaidy "Ult aqparat".
Vedomstvo basshysynyń málimetinshe, elimizde eresek turǵyndardyń 21%-y temeki tartady, balalardyń 20%-y artyq dene salmaǵynan, al 6%-y semizdikten zardap shegedi. 11-15 jastaǵy jasóspirimderdiń veipterdi turaqty túrde shegýi - 10%, energetikalyq, tátti sýsyndardy ishýi -17,5%, artyq dene salmaǵynyń taralýy 15% bolyp otyr.
Sonymen qatar osy salanyń ózekti máseleleri de bar. Birinshi - meditsinalyq kómektiń tolyq qoljetimdiligin qamtamasyz etý. Bul máseleler boiynsha halyqtan shaǵymdardyń eń kóp sany Astana, Almaty qalalaryna, Aqmola, Atyraý oblystaryna tiesili.
"Mindetti áleýmettik meditsinalyq saqtandyrý júiesinde 3,3 mln halyq saqtandyrylmaǵan kúiinde qalyp otyr. Eń kóp sany Jetisý, Almaty, Jambyl oblystarynda jáne Shymkent qalasynda baiqalady. Meditsina kadrlaryna degen qajettilik tómendeýine qaramastan áli de saqtalyp otyr. Bul kórsetkish Qostanai, Aqmola, Soltústik Qazaqstan, Túrkistan, Batys Qazaqstan oblystarynda basym. Sonymen qatar meditsina obektileriniń infraqurylymy áli de jetkiliksiz. Búginde 200-den astam aýyldyq eldi mekende meditsina obektileri joq. Ǵimarattardyń tozýy 56%, meditsinalyq tehnikamen jaraqtandyrý -50%", - deidi Ǵiniiat.
Ministr osy ózekti máselelerdiń sheshilý joldaryna da toqtaldy.
"Alǵashqy kómektiń qoljetimdiligin arttyrý úshin meditsina kómeginiń 57%-yn memlekettik ambýlatoriialyq-emhanalyq uiymdar, 43%-yn jekemenshik uiymdar kórsetedi, iaǵni básekelestik úshin jeke meditsina keńinen tartylyp jatyr. Ambýlatoriialyq deńgeidegi qarjylandyrý ulǵaidy. Ol Dúniejúzilik densaýlyq saqtaý uiymy usynǵan 60% jalpy kólemniń 56%-yna teń. 3 jylda konsýltatsiialyq-diagnostikalyq kómek 7 ese ósti. Qymbat KT qyzmetteriniń qoljetimdiligi 9 ese, MRT - 6 ese ósti. Biyl 6 aida 200 mlnnan astam konsýltatsiialyq-diagnostikalyq qyzmet kórsetildi" - dedi ol Úkimet otyrysynda.
