Foto: gov.kz
Jambyl oblysynyń Merki aýdanynda 108 mln teńge kólemindegi biýdjet qarajatynyń jymqyrylǵany anyqtaldy, dep habarlaidy Ult.kz.
Prokýratýra júrgizgen taldaý barysynda aýdandyq ákimdiktiń sáýlet, qala qurylysy jáne qurylys bólimi memleket qarjysyn zańsyz jumsaǵany belgili boldy. Atap aitqanda, Myńqazan aýylyndaǵy turǵyn úi massivine elektr jelilerin tartý jobasy boiynsha is júzinde oryndalmaǵan jumystarǵa qaramastan, merdiger uiymǵa qarjy aýdarylǵan.
Nátijesinde memleketke 108 mln teńge zalal keltirilgen.
Atalǵan fakti boiynsha 2026 jylǵy 30 naýryzda QR Qylmystyq kodeksiniń 189-baby 4-bóligi 2-tarmaǵymen sotqa deiingi tergeý bastaldy. Qylmystyq is ári qarai tekserý júrgizý úshin UQK-niń Jambyl oblysy boiynsha departamentine berilgen.
Qazirgi tańda tergeý jalǵasyp jatyr. QR Qylmystyq-protsestik kodeksiniń 201-babyna sáikes ózge málimetter jariialanbaidy.
Aita keteiik, buǵan deiin 1 mln dollar jymqyrǵan kúdikti Germaniiada ustalyp, Qazaqstanǵa ekstraditsiialanǵan bolatyn.
