Jýyrda 100 jyldyq mereitoiyn atap ótken soǵys ardageri Qaiyrly Jonqabaev Jeńis sarbazdaryna kórsetilip jatqan qurmet úshin QR Prezidenti Qasym-Jomart Toqaevtyń atyna hat joldap, batasyn berdi. Memleket basshysynyń baspasóz hatshysy Berik Ýáli qart maidangerdiń hatymen Facebook-tegi paraqshasynda bólisti, dep habarlaidy QazAqparat.
«Qurmetti Qasym-Jomart Kemeluly! Men Jonqabaev Qaiyrly Ýataiuly – Uly Otan soǵysynyń ardagerimin. Sizge ekinshi ret hat joldap otyrmyn. Aldyńǵy hatyma ózińizden jaýap alyp, riza boldym.
Men jaqynda 100 jasqa kelip, ǵasyr toiyma jettim.
Meniń Sizge degen alǵysym sheksiz. Almaty qalasynyń ákimi Baqytjan Saǵyntaev Sizdiń meniń ǵasyr toiyma arnap joldaǵan quttyqtaýyńyzdy jetkizdi, sán-saltanatpen tabys etti.
Odan soń Almatyda turyp jatqan úiimniń aýlasyna Ulttyq ulan sarbazdary quttyqtap kelip, áskeri orkestr oinap, erekshe iltipat, qurmet kórsetti. Ulttyq ulan Bas qolbasshysynyń atynan syi-siiapat berdi. «Ǵasyr jasaǵan panfilovshy» dep BAQ jarysa jariialady. Maǵan kórsetken osyndai qurmetterińizge qart maidangerdiń atynan úlken alǵysymdy bildirip, aq batamdy beremin.
Osylai, Jeńis sarbazdaryna kórsetip jatqan qurmetińiz, soǵystan qaitpaǵan, maidan dalasynda jáne keiin qaza bolǵan bozdaqtardyń rýhyna taǵzym etý dep túsinemin. Olardyń arýaqtary razy bolǵai!
Elimiz úshin atqaryp jatqan oń isterińiz tabysty bolsyn. Siz basqaryp otyrǵan Qazaq eli gúldene bersin!», - dep jazdy Almaty qalasynyń turǵyny, qart maidanger Q.Jonqabaev óz hatynda.
Eske salsaq, 10 qyrkúiek kúni Almaty ákimi Baqytjan Saǵyntaev Memleket basshysynyń Qaiyrly Jonqabaevty júz jyldyq mereitoiymen quttyqtaǵan hatyn jetkizip, «Eńbegi úshin» tósbelgisin tabys etti.
Q.Toqaevtyń quttyqtaýynda Q.Jonqabaev surapyl jyldary Uly Otan soǵysyna attanyp, Keńes Odaǵynyń batyry Ivan Panfilov basqarǵan áigili 8-gvardiialyq atqyshtar diviziiasy quramynda pýlemetshi bolǵany, Máskeýdi qorǵaýdan bastalǵan maidan joryǵynda Belarýs, Polsha, Estoniia jerlerin jaýdan azat etýge qatysyp, Rjevtegi qandy urysta eren erliktiń úlgisin kórsetkeni atap ótilgen.
«Batyrlyqtyń belgisindei bolyp «Qyzyl Juldyz», II dárejeli «Otan soǵysy» ordenderi jáne «Erligi úshin», «Máskeýdi qorǵaǵany úshin» medaldary keýdeńizde jarqyrap tur.
Beibit kezeńde eseli eńbek etip, elimizdi órkendetýge mol úles qostyńyz. Ǵasyrlyq ǵumyryńyzda Qazaqstan Táýelsizdiginiń 30 jyldyǵyna da kýá bolyp otyrsyz. «Qarty bar eldiń qazynasy bar» degen. Árdaiym óskeleń urpaqqa aqyl-keńesińizdi aityp, taǵylym berý ómirlik qaǵidatyńyzǵa ainaldy.
100 jyldyq torqaly toiyńyzǵa orai Sizge zor densaýlyq jáne áýletińizge amandyq pen qut-bereke tileimin», - degen Memleket basshysy óz hatynda.
1941 jyly soǵysqa attanǵan Q.Jonqabaev nebári 20 jasta bolǵan. Búginde qart jaýynger 5 baladan 7 nemere, 14 shóbere súiip otyr.
