Búgin Astanada «Jańa gýmanitarlyq bilim. Qazaq tilindegi 100 jańa oqýlyq» jobasy, sonymen qatar qoǵamdyq sanany jańǵyrtýdyń tujyrymdamalyq problemalary talqylandy, dep habarlaidy "Ult aqparat" Baq.kz portalyna silteme jasap.
Jiyn barysynda Ulttyq aýdarma biýrosynyń atqarýshy direktory, «100 jańa oqýlyq» jobasynyń jetekshisi Raýan Kenjehanuly biylǵy jyly aýdarylyp bitýi tiis 18 oqýlyqqa jeke-jeke toqtalyp, onyń mańyzdylyǵyn, qazirgi zamandaǵy suranysyna mán berdi.
«Qazirgi kezde osy 100 oqýlyqqa negizdelgen «100kitap.kz» saity jumys istep tur. Sol jerde barlyq málmetter berilgen. Tańdap alynǵan kitaptardy kimder aýdarǵany, qansha ret basylyp shyqqany bári sol jerde tur» - deidi joba jetekshisi.
Onyń aaitýyna qaraǵanda kitaptar ataýynyń qazaqsha balamasyna qatysty da túrli usynystar men nusqalar bolǵan.
«Mysaly negizgi ataýyn týra qazaqshalaǵanda kóńilge qonymsyz, qazaqy túsinigimizge tompaq keletin aýdarmalar boldy. Biz solarmen kóp jumys jasadyq. Tipti áli de keibir kitaptardyń qazaqsha ataýyn naqty bere almai otyrmyz. Karen Armstrongtiń «A History of God: The 4000-year quest of judaism, christianity and islam» atty týyndysy (oryssha «Istoriia Boga») degen ataýdy týra aýdarsaq «Qudailar tarihy» bolýy kerek. Al bizdiń senim boiynsha týra solai berýge bolmaidy. Sonymen qatar Elliot Aronsonnyń «The Social Animal» atty týyndysyn da qazaqsha ataý tym kúrdeli. Mysaly «Áleýmettik haiýan» nemese «Qoǵamdyq janýar» dep ataý qazaqy bolmysymyzǵa jat» - deidi Raýan Kenjehanuly.
Qalai degenmen biylǵy jylǵa aýdarylady dep josparlanǵan 18 kitaptyń aýdarma jumysy bitti.
«Qazirgi kezde biylǵy josparlanǵan 18 kitap aýdarylyp bitti. Endi redaktorlarlyq jumys jasalyp jatyr. Biraq bul kitaptar kelesi jyldan bastap baspaǵa jiberiledi. Taǵy bir aita keterligi, bul kitaptar latyn álipbiimen basylady dep josparlap otyrmyz. Elbasy qazaq tiliniń latyn álipbiindegi alfavitiniń sońǵy nusqasy qaisy dep bekitip, qol qoiady, sol nusqamen basylady. Sondyqtan latyn álipbii bekitilgenshe bul kitaptar baspaǵa daiyndalatyn bolady» - dedi aýdarma biýrosynyń atqarýshy direktory.
Esterińizge sala keteiik, buǵan deiin 2017 jylda aýdarylýǵa tiis 17 kitaptyń tizimi jariialanǵan bolatyn.
