«100 jańa oqýlyq» jobasy aiasynda álemge úzdik dep tanylǵan taǵy 30 oqýlyq qazaq tiline aýdarylady, dep habarlaidy QazAqparat tilshisi.
Bul týraly Ulttyq aýdarma biýrosynyń atqarýshy direktory Raýan Kenjehanuly Astanada Jastar jylynyń resmi ashylýynda málimdedi.
«Qurmetti Elbasy, ótken jyly sizge «100 jańa oqýlyq» jobasymen aýdarylyp basylǵan alǵashqy 18 oqýlyqty tanystyrdyq. Árqaisysy elimizdegi 115 joǵary oqý ornyna 10 myń danamen taratyldy. Oqýlyqtardyń elektrondy nusqasy Internet arqyly erkin qoldanysqa berildi. Sonyń arqasynda bul joba az ǵana ýaqytta elimizdiń barlyq oqý oryndary, oqytýshylary men stýdentterine álemniń eń ozyq bilim men ǵylym ortalyqtarynyń altyn qoryn ashyp berdi», - dedi Raýan Kenjehanuly.
Onyń aitýynsha, dúnie júziniń eń bedeldi ǵalymdarynyń álemge milliondaǵan danamen taralǵan kelesi 30 oqýlyǵy qazaq tiline aýdarylyp jatyr. Bul oqýlyqtar da taiaý arada basylyp, jańa oqý jylynda stýdentterdiń qolyna tiedi.
Aýdarmamen qatar, jetekshi mamandar men oqytýshylardyń videodáristeri qamtylǵan onlain-kýrstar da ázirlenip jatyr.
«Videodárister konspektilermen, jattyǵýlarmen jáne bilimdi tekseretin suraq-jaýaptarmen tolyqtyrylǵan. Jańa oqýlyqtar negizdelip jasalǵan onlain-kýrstar «Astana ashyq ýniversiteti» atty jańa bilim berý jobasynyń negizi bolady», - dedi R. Kenjehanuly.
Aita keteiik, R. Kenjehanuly Qazaqstanda álemniń jetekshi ýniversitetteriniń onlain-kýrstaryn qoljetimdi etetin «Astana ashyq ýniversitetiniń» ashylatynyn málimdedi.
Jastar jylynyń resmi ashylýyna Úkimet músheleri, QR Parlamenti depýtattary, jergilikti atqarýshy organ basshylary, QR Prezidenti janyndaǵy Jastar saiasaty keńesiniń músheleri, «100 jańa esim» baiqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jiynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýi media salasynyń ókilderi, balalar úiiniń tárbielenýshileri men túlekteri, jas áskeri qyzmetshiler keldi.
Eske sala ketsek, QR Prezidenti Nursultan Nazarbaev Qazaqstan halqyna kezekti Joldaýynda 2019 jyldy Jastar jyly dep jariialaýdy usynǵan bolatyn.
Prezident óz sózinde jastardyń barlyq sanatyn qoldaýǵa arnalǵan sharalardy tolyq qamtityn áleýmettik satynyń aýqymdy platformasyn qalyptastyrý kerektigin aitqan bolatyn Al, arada bir aidan astam ýaqyt ótkende Elbasy Jarlyǵymen 2019 jyl Jastar jyly dep jariialandy.
.jpeg)