Foto: Inbusiness.kz
Qazaqstanda aqyly joldardyń sany jyldan jylǵa artyp keledi. Biraq júrgizýshiler tólegen aqshalarynyń qaida jumsalatynynan beihabar. Bul suraqqa Indýstriia jáne infraqurylymdyq damý ministrliginiń ókili jaýap berdi, dep habarlaidy Ult.kz.
"QazAvtoJol" qarjyny qalai paidalanady?
Ministrlik málimetinshe, eldegi barlyq aqyly joldardy «QazAvtoJol» ulttyq operatory basqarady. Jol paidalanýshylarynan túsken qarajat osy operatordyń arnaiy esepshotyna túsip, 100% memleket menshigine tiesili.
"Túsken qarjy joldardy kútip ustaý, qajetti tehnika satyp alý jáne basqa da shyǵyndarǵa jumsalady. Aqsha basqa maqsattarǵa paidalanylmaidy", — dep túsindirdi Avtomobil joldary komitetiniń basqarma basshysy.
Ótken jyldyń qarjysy qalai jumsaldy?
Ótken jyly aqyly joldardan 48 mlrd teńge tabys túsken. Onyń 70%-y joldardy normativke sai kútip ustaýǵa jumsalǵan. Bul qarjyny qys mezgilinde qar tazalaýǵa, jazda qoqystardy jinaýǵa qajetti tehnikalardy jalǵa alýǵa jáne olardy kútýge jumsaǵan. Al qalǵan 30%-yna jańa tehnikalar satyp alynǵan.
Josparlar men boljamdar
Biyl ministrlik aqyly joldardyń uzyndyǵyn 7 myń shaqyrymǵa jetkizýdi josparlap otyr. Jańa engizilgen 4 myń shaqyrym jol qosylady. Sonymen qatar, biyl aqyly joldardan 60 milliard teńge, al kelesi jyly 100 milliard teńge tabys túsedi dep boljanýda.
Qarjynyń artylǵan bóligi qaida jumsalady?
Ǵabit Shymyrbaevtyń aitýynsha, aqyly joldardan túsken qarjy negizinen joldardy kútip ustaýǵa jetkilikti. Biraq qarjy artyq qalǵan jaǵdaida, ol kezeń-kezeńimen jańa joldar salýǵa jumsalatyn bolady.
"Qoldanystaǵy zańnamaǵa sáikes, qarajat birinshi kezekte joldardy kútip ustaýǵa, ekinshi kezekte tehnika satyp alýǵa baǵyttalady. Al eger osy shyǵyndardan qarjy artylsa, jańa joldar salýǵa paidalanamyz", — dedi Shymyrbaev.
