Foto: Polisia.kz
Elorda politsiiasy turǵynǵa 100 mln teńgeden astam shyǵyn keltirgen iri páter urlyǵyna qatysy bar eki kúdiktini ustady, bireýi izdestirilip jatyr, – dep habarlaidy "Ult aqparat" Polisia.kz portalyna silteme jasap.
Elordada Saryarqa aýdanynyń politseileri jedel-izdestirý sharalary barysynda iri páter urlyǵyna qatysty degen kúdikpen 46 jáne 60 jastaǵy eki er adamdy anyqtady.
Kúdiktiler ustalǵannan birneshe kún buryn jergilikti turǵyn politsiiaǵa habarlasyp, páterinen 4 shveitsariialyq saǵat, 2200 AQSh dollary jáne 650 myń teńge urlanǵanyn habarlaǵan. Er adam keltirilgen materialdyq shyǵyndy 101 million teńgeden astam dep baǵalaǵan.
Jábirlenýshiniń aitýynsha, ol saǵattarynyń joǵalyp ketkenin Almaty qalasyna 10 kúnnen astam ýaqytqa baryp kelgen soń bilgen.
Úiine oralǵannan keiin kiim aýystyratyn bólmede zattardy suryptap jatqanda, ashylǵan seifti kórgen. Onda quny 110 myń AQSh dollary turatyn Breguet Tourbillon, árqaisysy 55 myń AQSh dollary turatyn Franck Muller, men Daniel Roth jáne 1000 AQSh dollary turatyn Rado saǵattarynyń qoldy bolǵanyn ańǵarǵan. Sonymen qatar seifte turǵan 650 myń teńge men 2200 AQSh dollary da urlanǵanyn bilgen.
Jedel-izdestirý is-sharalaryn júrgizý barysynda jedel ýákilder urylardyń izine túsip, olardy tapqan. Belgili bolǵandai olar páterdiń iesi joq ekenin bilip, úi-jaiǵa kiltterdi tańdaý arqyly kirgen.
"Ustalǵandar kinásin moiyndap, urlanǵan qundy zattar jartylai tárkilendi. Olar Breguet Tourbillon saǵatyn Shymkent qalasyndaǵy bazarda buzyp, altyn bólshekterin belgisiz áielge satyp jibergeni de belgili bolǵan.
Jedel qyzmetkerler kúdiktilerdiń turǵylyqty jerin tintý barysynda qulyptardy ashýǵa arnalǵan qurylǵylar men negizgi ashqan kiltterdi tárkiledi.
Qazirgi ýaqytta toptyń úshinshi múshesiniń turǵan jerin anyqtaý úshin jedel-izdestirý jumystary jalǵasýda. Ustalǵandar Astana qalasy PD ýaqytsha ustaý izoliatoryna qamaldy, sotqa deiingi tergeý amaldary júrgizilip jatyr" - delingen habarlamada.
