Belgili qazaqstandyq músinshi, «100 jańa esim» jobasynyń «Mádeniet» nominatsiiasy boiynsha jeńimpazy Aidos Esmaǵambetov giperrealistik ekskliýzivti músin jasaý salasyn damytýdy jalǵastyratynyn aitty, dep habarlaidy QazAqparat.
«Men kishkentaiymnan sýret saldym. Ákem de sýret ónerin jaqsy meńgergen, mýzykadan habary bar adam. Jalpy, ata-anam ónerge jaqyn adamdar. Y.Altynsarin atyndaǵy Arqalyq memlekettik pedagogikalyq institýtyn bitirip, kásibi bilim aldym. Oqý ornynda negizgi baǵyttardy meńgerdim. Jalpy, giperrealizm baǵyty oqý ornynda engizilmegen, keiinnen paida bolǵan tehnologiia. Iaǵni kez kelgen ýniversitette músin, kesindeme sekildi naqty mamandyqtar ǵana bar, al giperrealizm siiaqty mamandyq joq», - dedi Aidos Esmaǵambetov.
Osy oraida ol giperrealistik ekskliýzivti músinderdi jasaýdy óziniń izdenisi arqyl meńgergenin jetkizdi.
«Basqa da sheteldik tanamal giperrealisterdiń eńbekterin zertteýge tyrystym. Buqaralyq aqparat quraldarynda jazylǵan tanymal mamandardyń eńbekterin izdedim. Olardyń paidalanyp júrgen materialdaryn zerdelep, ózimniń zertteý tájiribelerimdi, eksperimentterdi jasadym. Atap aitqanda, bizdiń salada naqty jinaqtalǵan tehnologiia joq. Onyń barlyǵy aqparat jinaýmen, izdenispen keledi. Buǵan kóp ýaqyt kerek», - dedi músinshi.
Bul turǵyda Aidos Esmaǵambetov elimizde bul salany damytýmen ary qarai da ainalysatynyn atap ótti.
«Maqsatyma toqtalsam, madam Tiýsso mýzeii sekildi elimizde mýzei ashylǵanyn qalaimyn. Elordada osyndai mýzei ashylsa, sol jerge tulǵalardyń músinderin qoiýǵa bolar edi. Osynda belgili tarihi tulǵalar tursa, Qazaqstan halqy jáne sheteldik týrister tarapynan qyzyǵýshylyq bolady dep oilaimyn. Qazirgi kezde óz qarajatyma jylyna 1-2 músin jasap kelemin. Sondyqtan bul salany damytý úshin «100 jańa esim» jobasynyń aiasynda aldaǵy ýaqytta da nazar aýdarylyp otyrsa degen usynys bar. Jalpy, «100 jańa esim» jobasy sala mamandaryn keńinen tanymal etýge yqpal etedi dep bilemin. Biraz mamanǵa osy joba tyń serpin berdi degen pikirdemin», - tanymal músinshi.
Budan buryn habarlanǵandai, byltyr kúzde óziniń 60 jyldyq mereitoiyn atap ótetin «Qazaqkontsert» uiymy Abaidyń 175 jyldyǵyna orai uly aqynnyń jańa ekskliýzivti músinin tanystyrdy.
Elimizde sirek kezdesetin giperrealistik baǵyttaǵy músinniń avtory – talantty sýretshi ári músinshi Aidos Esmaǵambetov. Ol buǵan deiin Elbasy Nursultan Nazarbaevtyń, Barak Obamanyń, Abylai hannyń jáne general-polkovnik Saǵadat Nurmaǵambetovtiń giperrealistik músinderin jasaǵan.
