بەلگٸلٸ قازاقستاندىق مٷسٸنشٸ, «100 جاڭا ەسٸم» جوباسىنىڭ «مەدەنيەت» نوميناتسيياسى بويىنشا جەڭٸمپازى ايدوس ەسماعامبەتوۆ گيپەررەاليستٸك ەكسكليۋزيۆتٸ مٷسٸن جاساۋ سالاسىن دامىتۋدى جالعاستىراتىنىن ايتتى, دەپ حابارلايدى قازاقپارات.
«مەن كٸشكەنتايىمنان سۋرەت سالدىم. ەكەم دە سۋرەت ٶنەرٸن جاقسى مەڭگەرگەن, مۋزىكادان حابارى بار ادام. جالپى, اتا-انام ٶنەرگە جاقىن ادامدار. ى.التىنسارين اتىنداعى ارقالىق مەملەكەتتٸك پەداگوگيكالىق ينستيتۋتىن بٸتٸرٸپ, كەسٸبي بٸلٸم الدىم. وقۋ ورنىندا نەگٸزگٸ باعىتتاردى مەڭگەردٸم. جالپى, گيپەررەاليزم باعىتى وقۋ ورنىندا ەنگٸزٸلمەگەن, كەيٸننەن پايدا بولعان تەحنولوگييا. ياعني كەز كەلگەن ۋنيۆەرسيتەتتە مٷسٸن, كەسٸندەمە سەكٸلدٸ ناقتى ماماندىقتار عانا بار, ال گيپەررەاليزم سيياقتى ماماندىق جوق», - دەدٸ ايدوس ەسماعامبەتوۆ.
وسى ورايدا ول گيپەررەاليستٸك ەكسكليۋزيۆتٸ مٷسٸندەردٸ جاساۋدى ٶزٸنٸڭ ٸزدەنٸسٸ ارقىل مەڭگەرگەنٸن جەتكٸزدٸ.
«باسقا دا شەتەلدٸك تانامال گيپەررەاليستەردٸڭ ەڭبەكتەرٸن زەرتتەۋگە تىرىستىم. بۇقارالىق اقپارات قۇرالدارىندا جازىلعان تانىمال مامانداردىڭ ەڭبەكتەرٸن ٸزدەدٸم. ولاردىڭ پايدالانىپ جٷرگەن ماتەريالدارىن زەردەلەپ, ٶزٸمنٸڭ زەرتتەۋ تەجٸريبەلەرٸمدٸ, ەكسپەريمەنتتەردٸ جاسادىم. اتاپ ايتقاندا, بٸزدٸڭ سالادا ناقتى جيناقتالعان تەحنولوگييا جوق. ونىڭ بارلىعى اقپارات جيناۋمەن, ٸزدەنٸسپەن كەلەدٸ. بۇعان كٶپ ۋاقىت كەرەك», - دەدٸ مٷسٸنشٸ.
بۇل تۇرعىدا ايدوس ەسماعامبەتوۆ ەلٸمٸزدە بۇل سالانى دامىتۋمەن ارى قاراي دا اينالىساتىنىن اتاپ ٶتتٸ.
«ماقساتىما توقتالسام, مادام تيۋسسو مۋزەيٸ سەكٸلدٸ ەلٸمٸزدە مۋزەي اشىلعانىن قالايمىن. ەلوردادا وسىنداي مۋزەي اشىلسا, سول جەرگە تۇلعالاردىڭ مٷسٸندەرٸن قويۋعا بولار ەدٸ. وسىندا بەلگٸلٸ تاريحي تۇلعالار تۇرسا, قازاقستان حالقى جەنە شەتەلدٸك تۋريستەر تاراپىنان قىزىعۋشىلىق بولادى دەپ ويلايمىن. قازٸرگٸ كەزدە ٶز قاراجاتىما جىلىنا 1-2 مٷسٸن جاساپ كەلەمٸن. سوندىقتان بۇل سالانى دامىتۋ ٷشٸن «100 جاڭا ەسٸم» جوباسىنىڭ اياسىندا الداعى ۋاقىتتا دا نازار اۋدارىلىپ وتىرسا دەگەن ۇسىنىس بار. جالپى, «100 جاڭا ەسٸم» جوباسى سالا ماماندارىن كەڭٸنەن تانىمال ەتۋگە ىقپال ەتەدٸ دەپ بٸلەمٸن. بٸراز مامانعا وسى جوبا تىڭ سەرپٸن بەردٸ دەگەن پٸكٸردەمٸن», - تانىمال مٷسٸنشٸ.
بۇدان بۇرىن حابارلانعانداي, بىلتىر كٷزدە ٶزٸنٸڭ 60 جىلدىق مەرەيتويىن اتاپ ٶتەتٸن «قازاقكونتسەرت» ۇيىمى ابايدىڭ 175 جىلدىعىنا وراي ۇلى اقىننىڭ جاڭا ەكسكليۋزيۆتٸ مٷسٸنٸن تانىستىردى.
ەلٸمٸزدە سيرەك كەزدەسەتٸن گيپەررەاليستٸك باعىتتاعى مٷسٸننٸڭ اۆتورى – تالانتتى سۋرەتشٸ ەرٸ مٷسٸنشٸ ايدوس ەسماعامبەتوۆ. ول بۇعان دەيٸن ەلباسى نۇرسۇلتان نازارباەۆتىڭ, باراك وبامانىڭ, ابىلاي حاننىڭ جەنە گەنەرال-پولكوۆنيك ساعادات نۇرماعامبەتوۆتٸڭ گيپەررەاليستٸك مٷسٸندەرٸن جاساعان.
