Jetisý oblysynyń politseileri áleýmettik jelide kóp jyl eńbek quldyǵynda bolǵanyn aityp, halyqtan kómek suraǵan er adamdy tapty, - dep habarlaidy Tengrinews.kz agenttigi.
22 qarashada áleýmettik jelide 10 jyl Qaratal aýdanyndaǵy sharýa qojalyq iesiniń quldyǵynda bolǵanyn málimdegen er adamnyń videosy tarady. Politseiler videonyń avtory Úshtóbe qalasynyń 44 jastaǵy turǵyny ekenin anyqtady.
Er adam óziniń jáne otbasy músheleriniń qujattaryn jumys berýshi zańsyz iemdengenin aitady.
"Qazir er adamnyń ótinishi resmi túrde tirkeldi. Oǵan qatysy bar barlyq adamdardan túsinikteme alyndy. Iaǵni, sharýa qojalyǵynyń iesi, onyń qyzmetkerleri, sondai-aq jábirlenýshiniń týystary. Qujattardy zańsyz alý deregi boiynsha tergeý amaldary bastaldy. Qylmystyq is aiasynda, ótinish berýshiniń eńbekti paidalanýy týraly keltirgen dálelderi de tekserilip jatyr", - dedi oblys PD bastyǵynyń orynbasary Eldar Ábdikenov.
Politseilerdiń aitýynsha, er adam men qyzyna kómek kórsetilgen. Tergeý barysynda olar Taldyqorǵan óńirlik "Áielderdi qoldaý ortalyǵy" qoǵamdyq birlestiginiń ókilderi usynǵan turǵyn úimen, kiimmen jáne tamaqpen qamtamasyz etilgen. Sondai-aq, osy is boiynsha barlyq tergeý áreketteri Oblystyq politsiia departamenti basshylyǵynyń erekshe baqylaýyna alynǵan.
