Foto: ashyq derekkóz
2025 jylǵy 4 qarashada QS Quacquarelli Symonds joǵary bilim berý salasyndaǵy halyqaralyq taldaý agenttigi QS Asia University Rankings 2026 – Aziianyń eń úzdik ýniversitetteri reitinginiń 2026 jylǵy tizimin jariialady, dep habarlaidy Ult.kz.
Bul aimaqtyq reiting Shyǵys, Ońtústik-Shyǵys, Ońtústik jáne Ortalyq Aziia óńirlerindegi ýniversitetterdiń jetistikterin saraptaidy. Biylǵy reiting – óziniń tarihyndaǵy eń aýqymdy reiting bolyp otyr, oǵan 25 elden 1529 ýniversitet engen, onyń ishinde 554 joǵary oqý orny alǵash ret tizimge kirdi.
Ortalyq Aziia elderi arasynda Qazaqstan QS Asia University Rankings reitinginde qatysý aiasyn aitarlyqtai keńeitti – 112 ýniversitettiń ishinde 44 qazaqstandyq JOO endi. Salystyrý úshin: Ózbekstannan – 22 ýniversitet (204-ten), Qyrǵyzstannan – 6 ýniversitet (61-den), Tájikstannan 1 ýniversitet (27-den) engen.
Atap ótý kerek, biyl reitingke 10 jańa qazaqstandyq ýniversitet endi:
- - Nazarbaev ýniversiteti – 201 oryn;
- - Almaty Menedjment ýniversiteti – 741-750 oryndar;
- - Muhamedjan Tynyshbaev atyndaǵy ALT ýniversiteti – 1001-1100 oryndar;
- - Abai Myrzahmetov atyndaǵy Kókshetaý ýniversiteti – 1101-1200 oryndar;
- - Alikhan Bokeikhan University – 1201-1300 oryndar;
- - Kaspii ýniversiteti – 1201-1300 oryndar;
- - Rýdnyi indýstriialyq institýty – 1301-1400 oryndar;
- - Ózbekáli Jánibekov atyndaǵy Ońtústik Qazaqstan pedagogikalyq ýniversiteti – 1301-1400 oryndar;
- - Astana International University – 1401-1500 oryndar;
- - Safi Ótebaev atyndaǵy Atyraý munai jáne gaz ýniversiteti – 1401-1500 oryndar.
Qazaqstandyq ýniversitetter akademiialyq bedel, oqytý sapasy, halyqaralyq yntymaqtastyq jáne túlekterdiń eńbek naryǵyndaǵy suranysy siiaqty reitingtiń negizgi kórsetkishteri boiynsha aimaqtaǵy úzdik nátijelerdiń birin kórsetip jatyr.
Sonymen qatar Qazaqstan – Ortalyq Aziia elderi ishinde Aziianyń eń úzdik top-100 ýniversitetine kirgen jalǵyz memleket: ál-Farabi atyndaǵy Qazaq ulttyq ýniversiteti – 38 oryn, L.N. Gýmilev atyndaǵy Eýraziia ulttyq ýniversiteti – 61 oryn, Satbayev University – 79 oryn.
Qazaqstannyń reitingtegi pozitsiiasynyń ósýi akademiialyq standarttardyń artýymen qatar halyqaralyq strategiialyq seriktestikterdi damytýda júieli jumysynyń nátijesin kórsetedi. Reiting derekteri boiynsha sheteldik jetekshi ýniversitetterdiń filialdaryn ashý jáne birlesken bilim berý men ǵylymi jobalarǵa qatysý eldiń joǵary bilim berý júiesiniń básekege qabilettiligin arttyrýǵa yqpal etedi.
Qazirgi tańda reitingke engen 29 qazaqstandyq JOO álemniń jetekshi ýniversitetterimen strategiialyq áriptestik ornatqan, al 15 joǵary oqý ornynda sheteldik ýniversitetterdiń filialdary jumys isteidi.
Internatsionalizatsiia kórsetkishteri de erekshe nazar aýdarady. QS agenttiginiń málimetinshe, Qazaqstan halyqaralyq stýdentter men zertteýshiler úshin aimaqtyq bilim ortalyǵyna ainalyp keledi. Bul el ýniversitetterinde sheteldik stýdentter men oqytýshylardyń úlesiniń joǵary bolýymen dáleldenedi.
Osylaisha, joǵary oqý oryndaryn strategiialyq seriktestikter qurý arqyly transformatsiialaý Qazaqstannyń jahandyq bilim keńistigine kirigýiniń negizine ainalyp, joǵary bilim berý salasyndaǵy memlekettik saiasattyń tiimdiligin kórsetip otyr.
Aita ketsek, QS agenttigi reitingti jyl saiyn kúzde jariialaidy. Akademiialyq kezeń kúzde bastalatyndyqtan ataýda kelesi jyl kórsetiledi jáne reiting kelesi kúntizbelik jyl boiy ózektiligin saqtaidy.
