Qostanaida óńiraralyq baǵytta iri kólemdegi esirtkini tasymaldaǵan 25 jastaǵy kýrer ustaldy. Odan 1,5 keliden astam esirtki tárkilenip, 10 myńnan astam bir rettik dozanyń zańsyz ainalymǵa túsýine jol berilmedi, dep habarlaidy ult.kz.
Polisia.kz málimetinshe, Ishki ister ministrligi «Zań men tártip» qaǵidaty aiasynda internet arqyly esirtki taratýmen ainalysatyn zańsyz dúkenderdiń qyzmetin anyqtaý jáne jolyn kesý jumystaryn jalǵastyryp jatyr.
Jedel-izdestirý is-sharalary barysynda Qostanai qalasynda óńiraralyq baǵytta áreket etken internet-esirtki dúkeniniń 25 jastaǵy kýreri ustaldy. Tergeý málimetinshe, ol elimizdiń ár óńirine iri kólemdegi esirtki partiialaryn jetkizip, keiin olardy jasyryn oryndarǵa qaldyrý arqyly taratqan.
Kúdikti qylmysyn jasyrý úshin esirtkilerdi vakýýmdyq qaptamalarǵa orap, qurǵaq sút qaptarynyń ishine jasyrǵan. Bul tásil júkti tasymaldaý kezinde kúdik týǵyzbaý jáne quqyq qorǵaý organdarynyń anyqtaýyn qiyndatý maqsatynda qoldanylǵan.
Tintý barysynda zańsyz ainalymnan jalpy salmaǵy 1,5 keliden asatyn metkatinon psihotroptyq zaty men keptirilgen marihýana tárkilendi. Saraptama qorytyndysyna sáikes, bul kólem 10 myńnan astam bir rettik dozaǵa teń.
Qazir politsiia qylmystyq shemany uiymdastyrýshylardy, esirtki jetkizý arnalary men internet-dúkenniń jumysyna qatysy bar basqa da tulǵalardy anyqtap jatyr.
IIM internet arqyly esirtki taratýǵa kez kelgen deńgeide qatysý – uiymdastyrýshy, operator, kýrer nemese jasyryn oryndarǵa esirtki qaldyrýshy bolsyn – aýyr qylmys ekenin eskertti. Mundai áreketter úshin zańnamaǵa sáikes ómir boiyna bas bostandyǵynan aiyrýǵa deiingi jaza qarastyrylǵan.
Vedomstvo esirtkiniń zańsyz ainalymyna qarsy kúres pen internet arqyly áreket etetin esirtki jelilerin anyqtaý jáne joiý jumystary turaqty túrde jalǵasatynyn málimdedi.
