COVID-19 juqtyrǵandar sanynyń artýyna bailanysty Jambyl oblysynyń ákimi Berdibek Saparbaevtyń tóraǵalyǵymen koronavirýstyq infektsiianyń taralýyna qarsy kúres jónindegi shtabtyń kezekti otyrysy ótti, dep habarlaidy "Ult aqparat".
Ótken táýlikte taldama qorytyndysy 57 adamda oń nátije kórsetip, ósim 0,7 paiyzdy qurady. Eń kóp jaǵdai anyqtalǵandar – ádettegidei Taraz qalasy, Qordai jáne Baizaq aýdandary. Oblys ortalyǵy «qyzyl» aimaqta desek, shahardaǵy aptalyq ósim 304 naýqasqa jetip, 8,7 paiyzdy quraǵan. Qordaida bul kórsetkish – 6,2 paiyzǵa ainalyp otyr. Al, respýblikalyq kórsetkish 5,6 paiyzdan aspaidy.
Densaýlyq saqtaý basqarmasynyń basshysy Áset Qalievtiń aitýynsha, 27 sáýirdegi jaǵdai boiynsha infektsiialyq statsionarda 897 adam em alýda (tósek-oryndardyń tolý júktemesi – 36%), onyń 54-i jan saqtaý bóliminde. Meditsinalyq mekemelerdiń materialdyq-tehnikalyq jabdyqtalýy men dári-dármektermen qamtylýy boiynsha eshqandai másele joq.
Oblysta 37 egý pýnkti jumys isteýde. 36,7 myń jambyldyq vaktsinanyń birinshi komponentin, 9,9 myń jambyldyq ekinshi komponentin qabyldaǵan. Moiynqum, Shý, Merki aýdandarynda jáne Taraz qalalyq №9 emhanada vaktsinatsiia álsiz qarqynmen júrýde. Sáýir aiynyń sońyna deiin taǵy 49,9 myń adamǵa ekpe egilýi kerek.
Sanitarlyq-epidemiologiialyq baqylaý departamentiniń basshysy Baidildá Shynaliev qazirgi tańda qosymsha shekteýler engizý týraly qujat ázirlenip jatqanyn jetkizdi. Onyń aitýynsha, jańa sharalar bazarlardyń, oblysaralyq avtobýs qatynasy men basqa da segmentterdiń qyzmetine áser etedi.
Óz kezeginde oblys ákiminiń orynbasary Almas Mádiev Ashyq jobasynyń álsiz iske asyrylyp jatqanyna nazar aýdartty. Ol boiynsha Tarazdaǵy tek 39 kásiporyn ǵana jumys isteýde, al aýdandarda bul tájiribe múldem taratylmaǵan.
«Tótenshe jaǵdailar departamenti monitoringtik toptardyń jumysyna eshqandai kómek kórsetip otyrǵan joq. Olarmen turaqty bailanysta bolý úshin TJD bastyǵy shuǵyl máselelerdi sheshý boiynsha óz orynbasaryn bekitýi qajet. Turǵyndar arasynda sanitarlyq normalardy qatań saqtaý qajettiligi týraly túsindirý jumystarynyń aýqymyn keńeitý asa mańyzdy. Qoǵamdyq kólik pen bazarlarǵa airyqsha nazar aýdarý kerek. Mektep oqýshylary men muǵalimder arasyndaǵy infektsiianyń taralýyna baqylaýdy nazarǵa alyńyzdar», - dedi Berdibek Saparbaev.
