2020 jyly 10 myńǵa jýyq etnikalyq qazaq qandas mártebesin aldy. Bul týraly Eńbek ministrligi habarlady.
Aǵymdaǵy jyldyń 1 qyrkúiegindegi jaǵdai boiynsha 9,9 myń adam tarihi Otanymen tabysyp, qandas mártebesin aldy. Jalpy 1991 jyldan beri respýblikaǵa 1 million 67,2 myń etnikalyq qazaq oraldy.
Osy jyly Qazaqstanǵa kelgen qandastardyń jartysynan kóbi (59,1%) Qytaidan, 25,6% Ózbekstannan, 8,8% Túrikmenstannan, 3,5% Mońǵoliiadan jáne 3% basqa elderden.
Kelgen etnikalyq qazaqtar negizinen Almaty (54,6%) jáne Mańǵystaý (12,7%) oblystaryna, sondai-aq Nur-Sultan (4,1%) jáne Shymkent qalalaryna (3,1%) qonystandy.
«Kelýshilerdiń ishinde 60%-dan astamy eńbekke jaramdy jasta, al shamamen 5%-y ǵana zeinetkerler. Qandas mártebesin alǵandar, Qazaqstan azamattarymen qatar, Jumyspen qamtýdyń jol kartasy sheńberinde júzege asyrylatyn jobalar aiasynda, Jumyspen qamtý ortalyqtary arqyly jumys taba alady», - dedi QR Eńbek jáne halyqty áleýmettik qorǵaý ministrligi Eńbek, áleýmettik qorǵaý jáne kóshi-qon komitetiniń kóshi-qon monitoringi basqarmasynyń basshysy Dastan Aitqulov.
Aita ketý kerek, 2019 jyldyń osy kezeńinde 9,6 myńǵa jýyq etnikalyq qazaq qandas mártebesin aldy, onyń ishinde 53% Ózbekstannan, 26% Qytaidan, 21% Mońǵoliiadan, Túrkmenstannan jáne basqa elderden keldi.
