"Astana" telearnasynan alynǵan kadr
Oralda bosanǵan áiel 10 kúnnen beri komada jatyr. Áiel adamnyń otbasy bul jaǵdaiǵa dárigerlerdi aiyptaidy. Olardyń aitýynsha, dárigerler qiyn sátte eshqandai áreket etpegen, - dep habarlaidy Tengrinews.kz agenttigi "Astana" telearnasyna silteme jasap.
Týystarynyń aitýynsha, Tańsholpan Muqanovanyń júktiligi jaqsy ótken. Biraq bosanýyna birneshe kún buryn basy aýyrǵan. Naýqastyń qaiyn enesi Jańyl Imanqulovanyń sózinshe, áiel aýrýhanaǵa joǵary qan qysymymen túsken. Jaǵdaiy nasharlaǵan. Biraq dárigerler Tańsholpan es-túzsiz bolǵan kezde ǵana jaǵdaidy túsingen.
"Kelinim tósekte aýzynan kóbik shyǵyp jatty, qolyn kóterdi. Biraq oǵan eshkim barmady. Muny basqa bosanǵan áielder baiqap, dáriger shaqyrdy. Dárigerler bas aýrýyna shaǵymdanǵanyna nege nazar aýdarmady? Olar meniń kelinimdi aiaǵynan turǵyzýǵa, nemereme anasyn aman-saý qaitarýǵa mindetti!"- deidi Jańyl Imanqulova.
Tańsholpannyń anasy Bibigúl Muqanovanyń ózi - akýsher. Onyń aitýyna, dárigerler nemquraidy qaraǵan. Onyń pikirinshe, mundai simptomdar bolsa, shuǵyl túrde konsiliým shaqyryp, týystaryna habarlap, aýyr naýqasty sanaviatsiiamen elordaǵa jiberý qajet eken.
"Neirohirýrgtyń aitýynsha, miǵa qan quiylǵan. Kishkentai tamyrlar jarylyp, miy isingen. Biraq qandai da bir sebeptermen dárigerler tańerteńge deiin konsiliým shaqyrmai, kómek kórsetpei ustady. Operatsiia tek tańerteń jasaldy. Olar úide tynysh uiyqtamasa, ýaqytynda kómek kórsetse, qyzym mundai aýyr jaǵdaida bolmas edi!" - deidi áieldiń anasy.
Densaýlyq saqtaý basqarmasynyń mamandary jaǵdaidy anyqtaýǵa ýáde berdi.
"Respýblikalyq mamandarmen kúnde konsiliým ótkiziledi. Qazir komissiia quryldy, onyń qorytyndysy boiynsha perinataldyq ortalyqtyń meditsina qyzmetkerlerine qatysty sharalar qabyldanady", - dep túsindirdi BQO densaýlyq saqtaý basqarmasy basshysynyń orynbasary Ashat Balyqov.
Tansholpanǵa jedel kesar tiligin jasaǵan, ómirge qyz bala kelgen. Biraq otbasynyń qýanyshy uzaqqa sozylmady. Týystary áieldiń ómirin saqtap qalýyn jáne kinálilerdi jazalaýdy talap etip otyr.
