Almatyda 10 adamdy óltirdi dep aiyptalǵan er adam ómir boiyna bas bostandyǵynan aiyryldy, dep habarlaidy "Ult aqparat".
Almaty qalalyq qylmystyq ister jónindegi mamandandyrylǵan aýdanaralyq sotynyń málimetinshe, S. esimdi er adam 2013 jyly segiz adamdy óltirgeni úshin aiypty dep tanylyp, ómir boiyna bas bostandyǵynan aiyrylǵan. Ol jazasyn «Qara búrkit» qylmystyq-atqarý júiesiniń qaýipsizdigi barynsha joǵary mekemesinde ótep jatyr. Jaqynda onyń taǵy eki áieldiń ólimine qatysy bar ekeni anyqtalyp, dáleldendi. Osy iske qatysty búgin sot sheshim shyǵardy.
«2001 jyldyń kúzinde S. jábirlenýshiler B. men K.-nyń páterlerin iemdený maqsatynda olardyń senimine kirgen. Sol jyldyń qazan aiynda B. men K. esimdi áielderdi jalǵa alǵan úige shaqyryp, sol jerde olardy basqa adamdarmen birge óltirgen. Keiinnen sottalýshy men taǵy ózge adamdar menshik quqyǵynyń qujattaryn iemdenip, jalǵan senimhattar arqaly páterlerdi satqan», - delingen sottyń habarlamasynda.
Alqabiler sotynyń sheshimimen cottalýshy Qylmystyq kodekstiń 96-baby, 2-bóligi, «a, j, z» tarmaqtary boiynsha kináli dep tanylyp, oǵan qaitadan ómir boiyna bas bostandyǵynan aiyrý jazasy taǵaiyndaldy.
Úkim zańdy kúshine engen joq.
