Resei gazyn Germaniiaǵa jetkizetin Nord Stream 2 gaz qubyrynyń salynýy qaita jalǵasty. Bul týraly 11 jeltoqsan kúni joba menedjerleri málimdedi.
Málimdemede reseilik "Fortýna" kemesiniń qubyrdyń Baltyq teńiziniń Germaniiaǵa tiesili bóligindegi 2,6 shaqyrymdyq bóligin salyp jatqany habarlandy.
Dál osy kúni Germaniianyń sý joldary jáne keme qatynasy basqarmasy teńizshilerge qurylys aimaǵyn ainalyp ótý kerek ekenin habarlady. Basqarma qubyr salynatyn aimaqta balyq ustaýǵa ne zákir tastaýǵa tyiym saldy.
Resei gazynyń Germaniiaǵa tasymalyn eki ese arttyrýy tiis 11 milliard dollarlyq bul gaz qubyrynyń salynýy 2019 jyldyń sońynda AQSh sanktsiiasynan keiin toqtap qalǵan. Vashington gaz qubyryn salýǵa qatysy bar kompaniialardyń múlkin buǵattap, viza shekteýin engizetinin málimdegen.
AQSh prezidenti Donald Tramptyń ákimshiligi Germaniiany jáne Eýropanyń birqatar ózge elin Resei janar-jaǵarmaiyna táýeldi bolyp barady dep qatań synady. Polsha, Ýkraina jáne Baltyq elderi de gaz qubyryna qarsylyq bildirip, Máskeý bul qubyrdy saiasi qysym kórsetýshi úshin paidalanady dedi.
AQSh-tyń Berlindegi elshiligi 5 jeltoqsan kúni Germaniia úkimetin gaz qubyryn salýdy toqtatýǵa shaqyrdy.
"Germaniia men Eýroodaq qubyrdyń qurylysyna moratorii jariialaýǵa shaqyrýy tiis" - dedi 5 jeltoqsan kúni elshilik ókili Robin Kýinvill (hanym) Handelsblatt gazetine bergen suhbatynda.
Gaz qubyry jobasyndaǵy negizgi úles Reseidiń memleket baqylaýyndaǵy "Gazprom" kompaniiasyna tiesili. Jobaǵa Shell britan-niderland munai kompaniiasy, Germaniianyń Wintershall jáne Uniper groups, Frantsiianyń Engie, Avstriianyń OMV kompaniialary da qatysyp jatyr.
Qubyrdyń teńizdiń Germaniiaǵa qarasty bóligindegi 16 shaqyrylymy, Daniiaǵa qarasty bóligindegi 60 shaqyrymy áli tóselmegen.
Nord Stream 2 gaz qubyryn 2020 jyldyń basyna qarai aiaqtaýdy kózdegen Resei AQSh-ty energetikalyq sanktsiiany óziniń gazy men munaiyn kóbirek ótkizý úshin "qarý" retinde paidalanyp otyr dep aiyptady.
AQSh sanktsiiasynan keiin Resei prezidenti qubyrdyń 2021 jyldyń basyna qarai aiaqtalatynyna úmitti ekenin aitty.
Nord Stream 1 gaz qubyry 2011 jyly iske qosyldy.
