Foto: inbusiness.kz
Qazaqstanda dári-dármek qymbattaýy múmkin, dep habarlaidy "Ult aqparat" Astana telearnasyna silteme jasap. Farmatsevtikalyq biznes nysandarynyń ieleri baǵany kem degende 5% kóterýge májbúr ekenderin aitty. Óitkeni olar qymbat qural-jabdyqtardy satyp alyp, jańa mamandardy tartýǵa májbúr.
Áigerim Amanbaeva farmatsevtika salasynda 2 jyldan beri jumys isteidi. Osy ýaqyt aralyǵynda Abai aýdanynda 2 dárihana ashqan. Kásipkerdiń aitýynsha, mindetti tańbalaýdy engizý qosymsha shyǵyndarǵa ákep soǵady, sol úshin olar baǵany kóteredi.
“Eger olar shynymen tańbalaýdy qalasa, qoimadaǵy barlyǵyn belgiletsin. Bizge daiyn ónim kelsin, óitkeni dárihanalar tańbalaýmen alańdamaýy kerek. Olai bolmasa barlyq dárihanalar paida tappai, shaǵyn kásiporyndar jabylady”, – dedi jeke kásipker Áigerim Amanbaeva.
Qosymsha shyǵyndarǵa bailanysty dárihana ieleri ne jabylýǵa, ne dári baǵasyn kóterýge májbúr bolady.
Úkimet dárilik zattarǵa tańbalaýdy engizý eldegi kontrafaktilik ónimder men dári-dármektiń zańsyz satylý kólemin azaitý úshin qajet deidi. Degenmen Qazaqstandyq táýelsiz dárihanalar qaýymdastyǵy munymen másele sheshilmeitinine senimdi. Onymen kedende ainalysý kerek deidi mamandar.
“Bizdiń shekaramyz bárine ashyq. Kez kelgen nárse keledi. Ol kirgendikten, men ony belgilemeimin jáne ony satýdy jalǵastyramyn, bári de solai. Qalai satyldy, solai satylady. Biz qazir qaýlyny toqtata turýdy usynyp otyrmyz. Qaýymdastyǵymyzben birge jumys tobyn qurýdy usynamyz, biz usynys beremiz, olarmen birge jol kartasyn, tujyrymdamasyn, doktrinasyn, zań jobasyna túzetýler engizemiz”, – deidi Qazaqstan táýelsiz dárihanalar qaýymdastyǵynyń jetekshisi Talǵat Omarov.
