2019 jyldyń 1 aqpanynda Qazaqstan halqynyń sany 18 mln 431,5 myń adamǵa jetip, 2018 jyldyń 1 naýryzymen salystyrǵanda 235,7 myń adamǵa nemese 1,3 paiyzǵa ósti. Bul jaiynda QR UEM Statistika komitetinen málim etti, dep habarlaidy "Ult aqparat".
Atalǵan kezeńdegi halyq sany 10 mln 721,5 myń adamdy nemese jalpy halyq sanynyń 58,2 paiyzyn, al aýyl halqy 7 mln 710 myń adamdy nemese 41,8 paiyzdy qurady.
Osy jyldyń qańtar-aqpanynda respýblikada 1 jasqa deiingi 615 sábi (ótken jyldyń qańtar-aqpanynda - 587) ólimi tirkeldi. 2018 jyldyń qańtarymen salystyrǵanda 1 jasqa deiingi sábilerdiń ólim-jitimi 4,8 paiyzǵa kemidi. 2019 jyldyń qańtarynda sábi óliminiń koeffitsienti 1000 dúniege kelgen balaǵa shaqqanda 9,9 oqiǵa boldy. Sábi ólim-jitiminiń negizgi sebebi perinataldyq kezeńinde paida bolǵan jaǵdai sanalady. Onyń saldarynan qańtar-aqpanda 323 bala shetinedi. Týa bitken aýytqýdan 113, tynys alý músheleri aýrýynan 56, tótenshe jaǵdailardan 19 bala kóz jumdy.
Osy jyldyń qańtar-aqpanynda ótken jyldyń qańtar-aqpanymen salystyrǵanda Qazaqstanǵa kelýshilerdiń sany 16,2 paiyzǵa, ketýshilerdiń sany 16,2 paiyzǵa artty. Negizgi migratsiialyq almasýlar TMD elderine tiesili. TMD elderinen kelgenderdiń úlesi 85,5 paiyzdy jáne atalǵan memleketterge ketkender sany 89,5 paiyz boldy.
El aýmaǵynan tysqary ketken migranttar sany 3,7 paiyzǵa artty. Óńiraralyq qonys aýdarýda kóshi-qonnyń oń saldosy Batys Qazaqstan (7 adam), Mańǵystaý (69), Túrkistan (142) oblystarynda jáne Nur-sultan (4 146) men Almaty (4 632) qalalarynda tirkelgen.
