Bir myń injener sheteldik zaýyttarǵa taǵlymdamaǵa jiberiledi. Bul týraly Úkimet otyrysynda QR Indýstriia jáne infraqurylymdyq damý vitse-ministri Marat Qarabaev aitty, dep habarlaidy QazAqparat.
Vitse-ministrdiń atap ótýinshe, Halyq tabysyn arttyrý jónindegi 2025 jylǵa deiingi baǵdarlama aiasynda ministrlik 23 is-sharany iske asyrýǵa qatysady. Onyń ishinde 11-i boiynsha - jaýapty oryndaýshy. Is-sharalar negizinen jańa jumys oryndaryn ashýǵa, halyqty jumyspen qamtýǵa, turǵyn úi kesheni salasynda kórsetiletin servistik qyzmetter baǵalaryn ustap turýǵa, negizgi taýarlar, qurylys materialdary, jeńil, himiia jáne farmatsevtika ónerkásibi taýarlarynyń importyn almastyrýǵa baǵyttalǵan.
«Baǵdarlama aiasynda importty almastyratyn jáne eksportqa baǵdarlanǵan jobalar iske asyrylady. 80 jobaǵa jeńil sharttarmen nesie berý arqyly 2025 jylǵa deiin 23 myń jańa jumys ornyn ashý josparlanǵan. Nátijesinde eksport kólemi 2,3 trln teńgeni qurap, import 1,3 trln teńgege azaiýy tiis. Osy jobalardy shikizatpen, infraqurylymmen jáne injenerlik-tehnikalyq kadrlarmen qamtamasyz etý siiaqty júieli sipattaǵy máseleler sheshiletin bolady. Qazir Qazaqstan Damý banki jáne Ónerkásipti damytý qory arqyly osyndai jobalardy qarjylandyrý máselesi pysyqtalýda. Sonymen qatar álemniń jetekshi elderindegi ónerkásip zaýyttaryna 1 myńdai mamandy jiberip, qazaqstandyq injenerlik mamandardyń tájiribe deńgeiin kóterý josparlanýda», - dedi Marat Qarabaev.
