QR Eńbek jáne halyqty áleýmettik qorǵaý ministrligi, «Otandastar» qory jáne Dúniejúzi qazaqtary qaýymdastyǵy qandastardy qoldaýǵa baǵyttalǵan úshjaqty memorandýmǵa qol qoidy. Qujat syrttan qonys aýdarǵan qandastarmen qatar, sheteldegi qazaq diasporasyn da demeýdi kózdeidi, dep habarlaidy QazAqparat.
Shettegi qazaqtardy qoldaý negizinen mádeni-rýhani jáne áleýmettik turǵydan bolmaq. Osy baǵytta atalǵan úsh mekeme yntymaqpen jumys isteýge bekinip otyr.
«Táýelsizdiktiń 27 jylynda sheteldegi qazaqtardyń millionnan astamy Qazaqstanǵa kóship keldi. Qazir de kelýge niettiler bar. Olardyń 60 paiyzy - jumysqa jaramdy. Barlyǵy saýatty. Byltyrdyń ózinde arnaiy baǵdarlama aiasynda 18 myń adamnan turatyn 8 myńnan astam otbasy kóship keldi. Olardy negizinen adamy az soltústik pen shyǵystaǵy óńirlerge kóptep kóshirýimiz kerek. Shettegi qazaqtardy ishke tartý tek memlekettik organnyń mindeti ǵana bolmaýy kerek. Búgingi úshjaqty memorandým osyǵan deiin úsh bólek jumys istep kelgen uiymdardyń basyn biriktirip otyr. Nátijesi de jaman bolmaýy kerek», - dedi eńbek jáne halyqty áleýmettik qorǵaý ministri Berdibek Saparbaev.
Al dúniejúzi qazaqtary qaýymdastyǵy tóraǵasynyń orynbasary Zaýytbek Turysbekovtiń aitýynsha, Qazaqstanǵa syrttan 1 million qazaq kóship kelýge niet bildirgen.
«Ótkende ǵana Miýnhendegi kishi quryltaiǵa 800 qazaq keldi. Eń úlken másele - ondaǵy ulty qazaq jastar tili men dástúrin bilmeidi. Jasy 25-ten úlkender bolmasa, oǵan deiingiler múlde qazaq tilin umytqan. Osynyń jolyn kesý úshin 2 jastan bastap qazaq tilin úiretý jobasyn daiyndap jatyrmyz. Sondaǵy aǵa býyn ókilderi muny estip, qatty qýandy. Qoldap jatyr. Buǵan deiin elimizge bir millionnan astam qazaq kóship kelse, taǵy 1 million kóship kelýge neit bildirip otyr. Endigi mindet - solarǵa durys jaǵdai jasaý. Solardy abyroimen qabyldasaq, ózgeler de oilanady», - dedi Zaýytbek Turysbekov.
