QR prezidenti Qasym-Jomart Toqaev halyqtyń problemalaryn atap ótti.
«Prezident retinde halqymyzǵa mynany aitqym keledi: elimizdiń ár azamatynyń múddesin qorǵaý - meniń basty maqsatym. Olardy saiasi kózqarastary men ustanymdaryna qarai bólýge jol bermeimin. Túrli saiasi jáne qoǵam qairatkerlerinen kelip túsken qundy usynystardy, bastamalardy men óz jumysymda mindetti túrde eskeremin. Ashyq jáne ádil jumys isteimin. Biz úshin eń mańyzdy mindet - zańǵa sai adal qyzmet etý. Bizdiń bir ǵana Otanymyz bar! Taǵdyrymyz bir! Biz halqymyzdyń jarqyn bolashaǵy úshin bárimiz birge eńbek etemiz!», - dedi Qasym-Jomart Toqaev QR prezidentin ulyqtaý rásiminde.
Memleket basshysynyń aitýynsha, Qazaqstandy jańa synaqtar men táýekelder kútip tur.
«Kóp jyl boiy halyqaralyq saiasatpen ainalysyp júrgen men úshin jańa dáýirdiń kelgeni seziledi. Saýda soǵystary, halyqaralyq qarym-qatynastaǵy daýly oqiǵalar, burynǵy qaýipsizdik tetikteriniń buzylýy, óńirlik daýlardyń artýy – osynyń barlyǵy jańa geosaiasi shynaiylyq. Aldaǵy birneshe jylda basty másele sheshiledi – damýǵa qandai elder qosylyp, qai elder álemdik damý shekarasynan shyǵyp qalatyny belgili bolady. Ekonomikalyq, áleýmettik jáne saiasi progress - qazirgi zamannyń synaqtaryna beretin eń durys jaýap», - dedi Toqaev.
Ol progresti adamdardyń ál-aýqatyn arttyratyn qolaily ózgerister retinde túsinetinin jetkizdi. Oǵan qosa, bilik adamdardyń usynystaryn qabyldap, problemalardy sheship, halyq aldynda esep berýi kerek.
«Sózben emes, ispen dáleldeý kerek. Bul ustanymdy Úkimet pen ákimderdiń barlyǵy ustanýy tiis. Maǵan prezident retinde eń mańyzdysy - ekonomikalyq damýdyń ortaq sandary emes, barlyq azamatyzdyń ál-aýqaty, jaǵdaiy», - dedi Prezident.
Qasym-Jomart Toqaev strategiialyq máseleler boiynsha sheshimder qabyldaǵanda kópshiliktiń pozitsiiasy eskeriletinin atap ótti.
«Bizdiń memlekettik bilik formýlasy – kúsh-jigeri myqty ókiletti prezident, yqpaldy, qabiletti Parlament, halyqqa esep beretin Úkimet. Dál osyndai saiasi júie asa aýyr saiasi shyndyq kezindegi bizdiń memleketimizdiń qajettilikterine tolyq sáikes keledi», - dedi Qasym-Jomart Toqaev.
Sodan soń memleket basshysy «Birge» aktsiiasyna qatysyp, azamattyq pozitsiiasyn bildirgenderge alǵys aitty. Osy ýaqytqa deiin 540 myńǵa jýyq usynys pen tilek túsken.
«Endi biz qoǵamnyń ózekti problemalaryn naqty kórip turmyz, olardyń sheshimin bilemiz. Azamattar barlyq jerde shyndyq bolǵanyn, memlekettik organdardyń áleýmettik saiasatynan bastap shyn qyzmet kórsetilgenin talap etedi. Halyqty mazalap otyrǵan basty suraq – tabys deńgeiiniń tómendigi. Halyqaralyq qarjy naryqtarynyń turaqsyzdanbaýy, teńgeniń quldyraýy turǵyndardyń tabysyna keri áser etti. 1 mln-nan astam azamat nesie alýǵa májbúr», - dedi Toqaev.
Ol qoǵamda azamattardyń joǵary jáne tómen tabysyndaǵy aiyrmashylyq alańdatyp otyrǵanyn atap ótti.
«Elimizge biryńǵai ekologiialyq saiasat qajet. Qorshaǵan ortany qorǵaý júiesine jańa serpin beretin jańa ekologiialyq kodeks kerek. Kelesi ózekti másele – taza aýyzsýmen qamtamasyz etý. Ol árbir úide, ár otbasynda bolý kerek. Sonymen qatar, turǵyndardy jol sapasy da alańdatyp otyr», - dedi Prezident.
