Foto: trend.az
Qazaqstanda 1 millionnan astam adam meditsinalyq saqtandyrý jarnasyn tólei almaidy. Olarǵa memleket kómektesýi múmkin. Bul týraly Densaýlyq saqtaý birinshi vitse-ministri Timýr Sultanǵaziev málimdedi, dep habarlaidy Sputnik Qazaqstan.
Resmi málimetke sáikes, Qazaqstanda 3 millionnan astam adam meditsinalyq saqtandyrý qoryna jarna tólemeidi.
"Olardyń ishinde 1 millionǵa jýyǵy shynymen de ózderi úshin meditsinalyq saqtandyrý qoryna jarna tólei almai júr. Qazirgi kezde osy máseleni sheshý joldary qarastyrylyp jatyr. Birneshe usynys bar. Sonyń ishinde jergilikti atqarýshy organdardy tartý arqyly máseleni sheshý mehanizmi qarastyrylǵan", - dedi Sultanǵaziev ortalyq kommýnikatsiialar qyzmetinde ótken brifingte.
Onyń sózine qaraǵanda, saqtandyrý jarnasyn sýbsidiialaý nemese basqa da sharalar arqyly kómek berilýi múmkin. Al qalǵan 1,5-2 million adam ózdigimen jarna tólei alady.
"Biz osy adamdarmen de jumys isteimiz. Negizgi maqsat – olardy meditsinalyq saqtandyrý júiesine tartý", - dep atap ótti vitse-ministr.
Aita keteri, meditsinalyq saqtandyrý qoryna jarna tólemeitin adamdar tegin alqashqy meditsinalyq kómekti shaqyrta alady. Al qymbat operatsiia úshin meditsinalyq saqtandyrý jarnasy tólenýi shart. Sońǵy ózgeristerge sáikes, jarnany bir jylǵa aldyn ala tólep, qajetti meditsinalyq kómekti ala berýge bolady.
