QR Úkimetiniń otyrysynda jańa oqý jylynyń bastalýyna daiyndyq týraly QR bilim jáne ǵylym ministri A. Aimaǵambetov baiandady.
QR BǴM jergilikti atqarýshy organdarmen birlesip oqýlyqtarmen qamtamasyz etý, bilim berý nysandaryn paidalanýǵa berý, balalardy tasymaldaýdy uiymdastyrý boiynsha jumystar júrgizip jatyr.
Mektepke deiingi uiymdar jelisi 279 birlikke ulǵaidy jáne kontingenti 906,5 myń bala bolatyn 10 593 mekemeni quraidy. Jekemenshik balabaqshalar úlesi artty - 37,9%, bul ótken jylmen salystyrǵanda 1,6%-ǵa kóp.
Jańa oqý jylynda mektepter 3 mln asa balany qabyldaýdy josparlap otyr. 1 synypqa 405 myńnan asa bala barady, bul ótken jylǵy kórsetkishten 20 myńǵa artyq. Jańa baǵdarlama boiynsha 4, 9, 10 synyptar oqityn bolady, kelesi jyly 11 synyp oqidy. Osylaisha, tolyq kóshý aiaqtalady.
A. Aimaǵambetov atap ótkendei, oqýlyqtar sapasyn qamtamasyz etý boiynsha jumystar jalǵasyp jatyr. Biyl «Jeńil portfel» jobasy júzege asyrylady. A.j. 1 qyrkúiekten bastap oqýshylar men ata-analar elektrondy oqýlyqtardy QR Bilim jáne ǵylym ministrliginiń saitynan júktep ala alady. Baspalardan oqýlyqtardyń tielýine kún saiyn baqylaý júrgiziledi.
«1 qyrkúiekke qarai barlyq oqýlyq árbir mektepke 100% jetkizilýi tiis. Ákimdikter bul máseleni kúndelikti baqylaýǵa alýlary kerek», - dedi A. Aimaǵambetov.
Elimizde 6678 mektepte aǵymdaǵy jóndeý jumystary júrgizildi, 129 mektepte kúrdeli jóndeý jumystary aiaqtaldy, 194 mektepte jóndeý jumystary jalǵasýda.
Qazir respýblikalyq biýdjet esebinen 115 mektep salynyp jatyr, onyń ishinde 57-si biyl paidalanýǵa beriledi, jergilikti biýdjet esebinen 79 mektep salynýda.
«Jekemenshik mektepterde jan basyna shaqqandaǵy qarjylandyrýdy engizý boiynsha jumystar bastaldy. Jan basyna shaqqandaǵy qarjylandyrýdy engizgenge deiin 121 jekemenshik mektep bolsa, qazir olardyń sany 146-ǵa jetti. 2019 jyldyń qańtar aiynan respýblikalyq biýdjette elimizdegi barlyq jumys istep turǵan jekemenshik mektepterde memlekettik tapsyrys ornalastyrý qarastyrylǵan», — dedi bilim jáne ǵylym ministri.
Memlekettik tapsyrys 22 310 oqýshy oryndyq 80 jekemenshik mektepke ornalastyryldy.
A.j. 1 tamyzdaǵy jaǵdai boiynsha 8 636 oryndyq 25 jekemenshik mektep ashyldy, jyl sońyna deiin 5845 oryndyq taǵy 23 mektep ashylady. 25 637 balany mektepke jetkizý úshin 918 birlik avtokólik paidalanylady. 2019 jyly 49 jańa avtobýs satyp alyndy.
Elimizde kontingenti 488,7 myń adam bolatyn 821 kolledj bar. Oqý jylynyń basyna qarai jataqhanalarda 1085 oryn paidalanýǵa beriledi.
