Qazaqstanda aiaq kiimdi mindetti tsifrlyq tańbalaý 2021 jylǵy 1 qarashadan engiziletin bolady, dep habarlaidy QazAqparat.
«Mundai sheshim sala ókilderimen ótkizilgen keńes nátijeleri boiynsha qabyldandy. 2021 jylǵy 1 qarashadan bastap tańbalanbaǵan aiaq kiimdi óndirýge jáne elimiz aýmaǵyna ákelýge tyiym salynady. Al bólshek saýda biznesinde tańbalanbaǵan taýarlardyń qaldyqtaryn satý úshin 2022 jyldyń 1 qarashasyna deiin qosymsha merzim bar», - delingen Tsifrlyq ekonomikany damytý ortalyǵy baspasóz qyzmetiniń málimetinde.
Budan buryn mindetti tsifrlyq tańbalaý 2021 jyldyń shildesinde engiziledi dep josparlanǵan bolatyn, alaida kóptegen importtaýshylar kúz-qys maýsymyna sheteldik óndirýshilerden aldyn ala jarty jylǵa erte taýarlarǵa tapsyrys beredi. Sondyqtan kóktemde tapsyrys berilgen tańbalanbaǵan aiaq kiimniń Qazaqstan shekarasyn 1 shildege deiin ótpei qalý qaýpi týyndaǵan bolatyn.
«Endi naryqta jańa normalarǵa muqiiat daiyndalý úshin taǵy bes ai jáne tańbalanbaǵan taýarlardyń qaldyqtaryn satý úshin bir jyldan astam ýaqyt bar. Biznes úshin táýlik boiy tsifrlyq tańbalaý boiynsha jedel jeli jumys isteidi. Tsifrlyq ekonomikany damytý ortalyǵy únemi mamandandyrylǵan vebinarlar ótkizedi, sala ókilderine jeke keńester beredi. Aiaq kiimdi tsifrlyq tańbalaý týraly paidaly aqparat markirovka.kz portalynda bar. Sondyqtan árbir kásipkerdiń naryqtaǵy jumystyń jańa erejelerine muqiiat daiyndalý múmkindigi men ýaqyty bar», - deidi Tsifrlyq ekonomikany damytý ortalyǵynyń bas direktory Bikesh Qurmanǵalieva.
Mindetti tsifrlyq tańbalaýdy engizýge keden qoimalary da daiyndalýda. Qoima aýmaǵynda kedendik rásimder kezinde sheteldik zaýyttarda tańbalanbaǵan taýarǵa Data Matrix tsifrlyq kody bar stikerler nemese etiketkalar ornatylatyn bolady.
Esterińizge sala keteiik, taýarlardy tsifrlyq tańbalaý – bul EAEO deńgeiinde júzege asyrylatyn ultaralyq joba. Aiaq kiim salasy elimizde mindetti tsifrlyq tańbalaý engiziletin alǵashqy salalardyń biri. Mundai sheshim naryqtaǵy kontrafaktilik deńgeiin eskere otyryp qabyldandy. QR QM Memlekettik kirister komitetiniń derekteri boiynsha aiaq kiimniń kóleńkeli naryǵy jalpy kólemniń shamamen 48,5%-yn quraidy. Aiaq kiimniń tsifrlyq tańbalanýy naryqty kontrafaktiden tazartýǵa yqpal etedi. Sonymen qatar, atalǵan shara qoǵamdyq baqylaýdy kúsheitýge múmkindik beredi. Naqty Onim mobildi qosymshasy arqyly tutynýshylar tańbalanǵan taýardyń túpnusqalyǵyn ońai teksere alady.
