Bir paiyz bolsa da sheteldik úlesi bar qazaqstandyq zańdy tulǵalarǵa jer berilmeidi. Bul týraly búgin aýyl sharýashylyǵy vitse-ministri Erlan Nysanbaev aitty, dep habarlaidy Sputnik Qazaqstan tilshisi.
Búgin Astanada 2016 jyly qurylǵan jer komissiiasynyń sheshimderi boiynsha ázirlengen jer zańy jaily qoǵamdyq talqylaý ótip jatyr. Jiynda sóz alǵan aýyl sharýashylyǵy vitse-ministri Nysanbaev zań jobasyna engizilgen ózgerister men tolyqtyrýlarǵa toqtaldy.
"2016 jyldyń mamyrynda Elbasynyń jarlyǵymen jáne tiisti zańymen Jer kodeksiniń jekelegen normalaryna 2021 jyldyń 31 jeltoqsanyna deiin moratorii engizildi. Atap aitqanda, aýyl sharýashylyǵy maqsatyndaǵy jerlerdi qazaqstandyqtarǵa jekemenshikke, sheteldikterge jalǵa berýge múlde tyiym salyndy. Qazirgi ýaqytta májiliste qaralyp jatqan zań jobasynda aýyl sharýashylyǵy maqsatyndaǵy jerlerdi satý jáne sheteldikterge jalǵa berý týraly birde-bir norma joq ekenin erekshe atap aitqym keledi. Kerisinshe bul zań jobasymen aýyl sharýashylyǵy jerlerin berýge engizilgen moratoriidiń sheńberin keńeitý qarastyrylyp otyr. Onda bir paiyz bolsa da sheteldik úlesi bar qazaqstandyq zańdy tulǵalarǵa jer berilmeitin bolady. Másele óte kúrdeli, ony egjei-tegjei pysyqtap, 2021 jyldyń sońyna deiin halyqpen birge talqylap, túpkilikti sheshim qabyldanady. Bul másele prezidenttiń, úkimettiń, ortalyq ókiletti organdardyń baqylaýynda", — dedi Nysanbaev.
Vitse-ministr jer reformasy boiynsha qurylǵan komissiianyń jergilikti turǵyndardyń usynystaryn eskere otyryp, qabyldaǵan sheshimderine toqtaldy.
"Birinshi, aýyl sharýashylyǵy jerlerin qazaqstandyqtarǵa jalǵa berý normasyn saqtaý jáne ony jetildirý. Ekinshi, qazaqstandyqtarǵa aýyl sharýashylyǵy jerleriniń jalǵa beriletin mólsherin shekteý. Úshinshi, shekara aimaqtaryndaǵy aýyl sharýashylyǵy jerlerin paidalaný talaptaryn kúsheitý. Tórtinshi, turǵyndardyń jaiylym alqaptarǵa degen qajettiligin qamtamasyz etý. Atalǵan usynystar negizinde Jer kodeksine ózgerister men túzetýler engizý boiynsha zań jobasy daiyndalyp, parlament májilisiniń qaraýyna engizildi", — dedi ministr orynbasary.
