Birinshi aqpannan bastap aqsha aiyrbastaýǵa bailanysty talap kúsheitiledi. Endi bir dollar aiyrbastasańyz da, jeke kýálik kerek bolady, – dep habarlaidy "Habar 24" arnasy.
Biraq kassir mekenjaiyńyzdy suramaidy. 2018 jyldan beri 500 myń teńgeden astam qarjyǵa valiýta alsańyz mekenjaiyńyzdy kórsetý mindettelgen.
Bul ózgerister qylmystyq jolmen alynǵan kiristerdi zańdastyrýǵa jáne terrorizmdi qarjylandyrýǵa qarsy jasalǵan amaldar deidi mamandar. Buǵan qosa aqsha aiyrbastaý pýnkteriniń jarǵylyq kapitaly artady. Qor mol bolsa, valiýta tapshylyǵy bolmaidy.
Sondai-aq birinshi aqpannan bastap aqsha aiyrbastaý pýnkteri tańerteńgi toǵyzdan keshki segizge deiin ǵana jumys isteidi. Al iri saýda ortalyqtarynda ornalasqandar túngi onǵa deiin, áýejai, temirjol vokzaly, shekara beketterindegiler táýlik boiy ashyq bolady.
Valiýtany aiyrbastaǵan kezde valiýtanyń quny aiyrbastaý pýnkterinde Qazaqstan qor birjasynyń kýrsyna bailanysty negizdeledi. Al Qazaqstan qor birjasynyń saýdasy kúndizgi ýaqytta júrgiziledi. Sońǵy saýda saǵat 17:00-de bitedi. Al burynǵydai túnimen jasai berse, aiyrbastaýdy erteńine Qazaqstan qor birjasynyń birinshi saýdasy ashylyp, jabylǵannan keiin kýrs múldem basqa bolyp ózgerip ketýi múmkin, - Qazaqstan qarjygerleri qaýymdastyǵynyń basqarýshy direktory Lázzat Úsenbekova.
