QR Memlekettik qyzmet isteri jáne sybailas jemqorlyqqa qarsy is-qimyl agenttigi eki ministrlikke usynym hat joldady. Onda meditsinalyq anyqtamalardyń zańsyz saýdasyna júrgizilgen tekseristiń nátijesi kórsetilgen, dep habarlaidy QazAqparat tilshisi.
Agenttiktiń Astana qalasy boiynsha departament basshynyń orynbasary Jazira Jylqyshievanyń aitýynsha, agenttik basshysy eki mekemege - QR Eńbek jáne halyqty áleýmettik qorǵaý ministrligine, sondai-aq QR Densaýlyq saqtaý ministrligine usynym hat joldady. «Birinshiden, Densaýlyq ministrligine úlken aqparattyq bazany jasaý qajet. Onda meditsinalyq tekseristen ótken barlyq adamdardyń tizimi bolýy shart. Jumys berýshiler adamdy qabyldaǵanda qaǵazdy suramaidy, adamnyń meditsinalyq tekseristen ótkenin, ia ótpegenin sol aqparattyq bazadan kóre alady. Al Eńbek jáne halyqty áleýmettik qorǵaý ministriligi jumys berýshiniń jeke jaýapkershiligin engizýi kerek. Ol jumysqa qandai adamdy qabyldap jatyr? Densaýlyǵy durys pa? Eger jumys berýshiniń jeke jaýapkershiligi bolsa, onda jumysqa turǵysy keletin adamdar da meditsinalyq tekserister durys ótetin bolady», - dedi J.Jylqyshieva QazAqparat tilshisine bergen suhbatynda.
Onyń sózine qaraǵanda, meditsinalyq anyqtamalardyń baǵasyn tómendetýge qatysty usynys ta bar. Búginde emhanada 086 úlgisindegi meditsinalyq anyqtamanyń baǵasy 5 myń teńge turady. Qosymsha narkolog pen psihiatrǵa qaralsa, ondai anyqtamanyń quny 6,5-7 myń teńgege shyǵyp ketedi. Al ǵalamtorda osy sanattaǵy zańsyz qujattardy 2,5-3 myńǵa satyp jatady.
«Biz densaýlyq saqtaý ministrligine meditsinalyq anyqtamalardyń baǵasyna qatysty taǵy bir usynys jasadyq. Sebebi qarapaiym adamdar úshin 5-6 myń aqsha shyǵarǵan ońai emes. Endi, naqty somany kórsetken joqpyz. Biraq baǵany tómendetýdi usyndyq. Áli bir ai ótken joq. Qazir jaýapty kútip otyrmyz», - dedi J.Jylqyshieva.
Aita keteiik, osydan bir ai buryn departament qyzmetkerleri uiymdasqan qylmystyq topty quryqtaǵan bolatyn. Olar joǵary sapaly kompiýterlik texnikanyń kómegimen meditsinalyq qujattardy basyp, halyq arasynda satyp kelgen. Tintý kezinde 086 úlgisindegi meditsinalyq anyqtamanyń 200-den astam blankisi, 190-ǵa jýyq sanitarlyq kitapsha, meditsinalyq mekemeler men dárigerlerdiń 80-nen astam mórleri, meditsinalyq analizderdiń nátijeleri, fliýrografiialyq sýretter, meditsinalyq diagnozdar jazylǵan kitapsha jáne taǵy basqa zattar tárkilendi.
Jazira Jylqyshievanyń aitýynsha, búginde Astana boiynsha 11 emxananyń 086 úlgisindegi meditsinalyq anyqtamany berýge ruqsaty bar. Ótken jyly atalǵan mekemelerde 30 myńǵa jýyq anyqtama berildi. Árbir anyqtamanyń baǵasy - 7 myń teńge.
«Kúni keshe Astana qalasy boiynsha sybailas jemqorlyqqa qarsy kúres departamenti meditsinalyq anyqtamalardy qoldan jasap kelgen qylmystyq topty ustady. Olar óz úilerinde jalǵan meditsinalyq qujattardy jasaǵan. Endi qarańyz, dál osy jaǵdaida kúnine 10 jalǵan meditsinalyq anyqtama berilip otyrdy. Sonda bir ǵana qylmystyq top jylyna 3 650 anyqtama jasai alady. Demek, Astananyń emxanalary bir jyldyń ishinde 25 550 000 teńgeden qaǵylyp otyr. Ol - tek 086 úlgisindegi anyqtamanyń shyǵyny ǵana», - dedi J.Jylqyshieva Astanada ótken baspasóz máslixatynda.
