تٷركٸستان وبلىسىنداعى جەتٸساي قالاسىندا بازارداعى ٶرتكە بايلانىستى ارنايى كوميسسييا قۇرىلدى. وبلىس ەكٸمٸ ٶمٸرزاق شٶكەەۆ وقيعانىڭ سەبەبٸن انىقتاۋ جەنە زارداپ شەككەندەرگە كٶمەك كٶرسەتۋ بويىنشا تاپسىرما بەردٸ.
بٷگٸن, ساعات 03:00-دە جەتٸساي قالاسىنداعى "كٷلپارشىن" بازارىنىڭ اۋماعىندا اۋدانى 500 شارشى مەتر بولاتىن جەكە تۇرعان بٸر قاباتتى عيماراتتا جەنە اۋدانى 400 شارشى مەتر قالقانىڭ استىندا ورنالاسقان اۋماقتان ٶرت شىقتى (بازاردىڭ جالپى اۋدانى – 2500 شارشى مەتر).
ٶرت تاڭعى ساعات 05:20-دا اۋىزدىقتالىپ, 07:35-تە سٶندٸرٸلدٸ. زارداپ شەككەندەر جوق. ٶرتتٸڭ شىعۋ سەبەبٸ انىقتالۋدا. جەلدٸڭ سالدارىنان ٶرتتٸ سٶندٸرۋ قيىن بولدى. جالىندى سٶندٸرۋگە 47 ٶرت سٶندٸرۋشٸ مەن 16 تەحنيكا جۇمىلدىرىلدى.
"تٷركٸستان وبلىسىنىڭ ەكٸمٸ ٶمٸرزاق شٶكەەۆتٸڭ تاپسىرماسى بويىنشا وقيعا سەبەپتەرٸن انىقتاۋ جەنە ٶرتتەن زارداپ شەككەندەرگە كٶمەك كٶرسەتۋ جٶنٸندەگٸ كوميسسييا قۇرىلدى. وعان وبلىس ەكٸمٸنٸڭ ورىنباسارى سەكەن قالقامانوۆ جەتەكشٸلٸك ەتەدٸ. كوميسسييا الدىندا ەڭ الدىمەن زارداپ شەككەندەردٸڭ سانىن ەسەپتەۋ, ماتەريالدىق زالالدى باعالاۋ, مٸندەتٸ تۇر. قازٸرگٸ ۋاقىتتا بازاردىڭ باسشىلىعى مەن قۇرىلتايشىلارى جەنە اۋدان بيلٸگٸ ساتۋشىلارمەن كەزدەستٸ. مەسەلە باقىلاۋعا الىندى" دەلٸنگەن باپاسٶز حابارلاماسىندا.
