جەنەۆادا ارمەنييانىڭ سىرتقى ٸستەر مينيسترٸ زوگراب مناتساكانيان مەن ەزەربايجاننىڭ سىرتقى ٸستەر مينيسترٸ دجەيحۋن بايراموۆپەن كەزدەسۋٸ اياقتالدى.
ارمەنييانىڭ سىرتقى ٸستەر مينيسترلٸگٸنٸڭ باسپاسٶز حاتشىسى اننا ناگدالياننىڭ ارمەنرەسس اگەنتتٸگٸنە مەلٸم ەتۋٸنشە, ارمەنييانىڭ سىرتقى ٸستەر مينيسترٸ زوگراب مناتساكانياننىڭ بايراموۆپەن كەزدەسۋٸ مينسكٸنٸڭ ەقىۇ-داعى توبىنىڭ تەڭ تٶراعالارىنىڭ قاتىسۋىمەن جەنەۆادا ەرەۆان ۋاقىتى بويىنشا ساعات 17:00-دە باستالدى.
ونىڭ الدىندا مناتساكانيان مينسكٸنٸڭ ەقىۇ-داعى توبىنىڭ تەڭ تٶراعالارىمەن جەنە ەقىۇ-نىڭ ٸس باسىنداعى تٶراعاسىنىڭ جەكە ٶكٸلٸ اندجەي كاسپرشيكپەن كەزدەسۋ ٶتكٸزدٸ.
ازەرتادج اگەنتتٸگٸنە سىرتقى ٸستەر مينيسترلٸگٸنٸڭ باسپاسٶز قىزمەتٸ باسقارماسىنىڭ حابارلۋىنشا, كەزدەسۋ بارىسىندا دجەيحۋن بايراموۆ شيەلەنٸستٸ حالىقارالىق قۇقىق پەن نورمالار جەنە بۇۇ-نىڭ قاۋٸپسٸزدٸك كەڭەسٸنٸڭ, حالىقارالىق ۇيىمداردىڭ قۇجاتتارىنىڭ تالاپتارىنا ساي رەتتەۋ باعىتىنداعى ەزەربايجاننىڭ پوزيتسيياسىن ۇسىندى.
گۋمانيتارلىق شارالار تۋرالى ايتا كەلە, دجەيحۋن بايراموۆ ەزەربايجان ۇسىنىپ وتىرعان كونسترۋكتيۆتٸ كٶزقاراستىڭ ماڭىزدىلىعىنا نازار اۋداردى.
وسى رەتتە ول ەزەربايجاندىقتاردىڭ ارميان تاراپىنا قايتىس بولعان ادامداردىڭ مەيٸتتەرٸ مەن قارت ەيەلدٸ تاپسىرعانىن ەسكە سالدى.
دجەيحۋن بايراموۆ ارمەنييا تاراپىنىڭ بەيبٸت تۇرعىندار مەن ەلدٸ مەكەندەردٸ اتقىلاۋى حالىقارالىق گۋمانيتارلىق قۇقىقتارعا قايشى ەكەنٸن ەسكەرتتٸ.
تاسس اگەنتتٸگٸ ەزەربايجان مەن ارمەنييا تاراپىنىڭ جۇما كٷنٸ جەنەۆادا ٶتكەن كەزدەسۋ بارىسىندا تاۋلى قاراباقتاعى اتىستى توقتاتۋ باعىتىندا بٸرقاتار شارا قولداناتىن بولىپ كەلٸسكەندٸگٸن جازدى.
بۇل رەتتە تاراپتار ەل تۇرعىندارى مەن ەسكەري ەمەس نىساندارعا قارۋ قولدانبايتىن بولدى. بۇل تۋرالى ەۋروپاداعى قاۋٸپسٸزدٸك پەن ىنتىماقتاستىق ۇيىمىنىڭ باسپاسٶز قىزمەتٸ حابارلاعان.
مەلٸمدەمەدە مينسكٸنٸڭ ەقىۇ-داعى توبىنىڭ رەسەي, فرانتسييا جەنە اقش تاراپىنان ۇسىنىلعان تەڭ تٶراعالارى 30 قازان كٷنٸ ارمەنييا مەن ەزەربايجاننىڭ سىرتقى ٸستەر مينيسترلەرٸمەن جەكە جەنە بٸرلەسكەن كەزدەسۋلەر ٶتكٸزگەنٸن حابارلادى.
ولار سونىمەن قاتار, ەقىۇ تٶراعاسىنىڭ جەكە ٶكٸلٸ اندجەي كاسپشيكپەن, بۇۇ-نىڭ بوسقىندار جٶنٸندەگٸ جوعارى كوميسسارى فيليپپو گرانديمەن جەنە حالىقارالىق قىزىل كرەست كوميتەتٸنٸڭ پرەزيدەنتٸ پەتەر ماۋرەرمەن كونسۋلتاتسييالار ٶكٸزگەن.
مينسكٸنٸڭ ەقىۇ-داعى توبىنىڭ مەلٸمدەمەسٸندە تاراپتاردىڭ حالىقارالىق گۋمانيتارلىق قۇقىق تالاپتارىنا سەيكەس, بەيبٸت تۇرعىندار مەن ەسكەري ەمەس نىسانداردىڭ نىساناعا المايتىنى ايتىلعان.
«تاراپتار ۇرىستا قايتىس بولعانداردىڭ مەيٸتتەرٸن الماسۋ جۇمىستارىن بەلسەندٸ جٷرگٸزبەك. بۇل رەتتە ولار حالىقارالىق قىزىل كرەست كوميتەتٸنە جەنە ەقىۇ-نىڭ جەكە ٶكٸلٸنە بٸرلەسكەن قيمىلدار كەزٸندە قاۋٸپسٸزدٸككە كەپٸلدٸك بەرٸلەتٸنٸن مەلٸمدەدٸ. تاراپتار اپتا ٸشٸندە حالىقارالىق قىزىق كرەست كوميتەتٸ مەن ەقىۇ-نىڭ جەكە ٶكٸلٸنە اشىقتىقتى قامتاماسىز ەتۋ ٷشٸن تۇتقىندار تۋرالى مەلٸمەتتەردٸ بەرەدٸ» - دەلٸنگەن ەقىۇ-نىڭ مەلٸمدەمەسٸندە.
