قازاقستان پرەزيدەنتٸ قاسىم-جومارت توقاەۆ «مارۋبەني» ساۋدا كومپانيياسىنىڭ ۆيتسە-تٶراعاسى شيگەرۋ يامازوەنٸ قابىلدادى, دەپ حابارلايدى "ۇلت اقپارات" اقورداعا سٸلتەمە جاساپ.
مەملەكەت باسشىسى جاپوندىق ساۋدا كومپانيياسىنىڭ تابىستى قىزمەت اتقارىپ جاتقانىن اتاپ ٶتٸپ, شەتەلدٸك ينۆەستورلار كەڭەسٸنٸڭ پلەنارلىق وتىرىسىنا قاتىساتىنىنا ريزاشىلىعىن بٸلدٸردٸ.
– بٸزدٸڭ جاپونييامەن اتوم ەنەرگيياسىن بەيبٸت ماقساتتا پايدالانۋ جٶنٸندەگٸ ىنتىماقتاستىعىمىزعا بيىل 25 جىل تولدى. بٸز وسى ارالىقتا قارىم-قاتىناستاردى جان-جاقتى كەڭەيتٸپ ەرٸ نىعايتا الدىق. سونىڭ ٸشٸندە, ەكٸجاقتى تيٸمدٸ ساۋدا-ەكونوميكالىق بايلانىسىمىز ارتتى. «مارۋبەني» كومپانيياسى قازاقستان نارىعىندا 1993 جىلدان بەرٸ تابىستى جۇمىس ٸستەپ كەلەدٸ, – دەدٸ قاسىم-جومارت توقاەۆ.
شيگەرۋ يامازوە قازاقستان مەن جاپونييا اراسىنداعى قارىم-قاتىناستاردىڭ نەگٸزٸن سالعان قر تۇڭعىش پرەزيدەنتٸ نۇرسۇلتان نازارباەۆتىڭ ەڭبەگٸن ەرەكشە اتاپ ٶتٸپ, مەملەكەت باسشىسى قاسىم-جومارت توقاەۆتىڭ بارلىق سالاداعى ەكٸجاقتى ىنتىماقتاستىقتى ودان ەرٸ جالعاستىراتىنىنا سەنٸم بٸلدٸردٸ.
– بٸز 30 جىلعا جۋىق قازاقستان نارىعىندا جۇمىس ٸستەپ كەلەمٸز. وسى ارالىقتا بٸز ينفراقۇرىلىم, ەنەرگەتيكا, كٶلٸك سالالارىنا ارالاسىپ, نۇر-سۇلتان قالاسىنىڭ ەۋەجاي قۇرىلىسىنا دا قاتىستىق. سونىمەن قاتار, بٸز 2007 جىلدان بەرٸ ەكٸ ەل دوستىعىنىڭ سيمۆولى ٸسپەتتەس – «حوراسان» جوباسىنا دا قاتىسىپ كەلەمٸز, – دەدٸ شيگەرۋ يامازوە.
