قر قورعانىس مينيسترلٸگٸ 29 تامىزدا جامبىل وبلىسىنداعى جارىلىس بولعان وق-دەرٸ قويماسىندا تارسىل دىبىسى ەستٸلگەنٸن, وندا ٷش ەسكەري قىزمەتشٸ بولعانىن راستادى, دەپ حابارلايدى "ۇلت اقپارات" ۆەدومستۆونىڭ باسپاسٶز قىزمەتٸنە سٸلتەمە جاساپ.
«29 تامىز كٷنٸ ساعات 12:20-دا جامبىل وبلىسىنداعى جارىلىس بولعان وق-دەرٸ قويماسىنىڭ ورنىندا راسىندا دا تارسىل دىبىسى ەستٸلدٸ. بۇل جٶنٸندە دەرەۋ رەسمي اقپارات بەرٸلدٸ. سول سەتتە قويما اۋماعىندا ٷش ادام بولعان. پروفيلاكتيكالىق ماقساتتا ولار تاراز قالاسىنداعى ەسكەري گوسپيتالعا تەكسەرٸلۋگە جٸبەرٸلدٸ. دەرٸگەرلەر ەسكەريلەردٸ قاراپ, ەش جاراقات-زاقىم تاپپادى. تەكسەرۋدەن كەيٸن ەسكەري قىزمەتشٸلەر قىزمەتٸنە ورالدى», - دەپ تٷسٸندٸردٸ قورعانىس مينيسترلٸگٸ.
قازٸرگٸ ۋاقىتتا 26 تامىزدا ٶرت پەن جارىلىستار بولعان ەسكەري بٶلٸمنٸڭ اينالاسىن تازارتۋ جۇمىستارى جالعاسۋدا.
«بۇل شارالار بارىسىندا قاۋٸپسٸزدٸك شارالارىن ساقتاۋ مەسەلەسٸنە ەرەكشە نازار اۋدارىلادى. وسى جۇمىستاردى جٷرگٸزۋگە تارتىلعان ەسكەري قىزمەتشٸلەر ارنايى قورعانىش كوستيۋمدەرٸندە جۇمىس ٸستەيدٸ», - دەيدٸ مينيسترلٸك.
ەستەرٸڭٸزگە سالا كەتسەك, 26 تامىزدا ساعات شامامەن 19:00-دە جامبىل وبلىسىنىڭ بايزاق اۋدانىندا ورنالاسقان ەسكەري بٶلٸم قويمالارىنىڭ بٸرٸنەن ٶرت شىعىپ, جويقىن جارىلىس بولدى. سوڭعى مەلٸمەت بويىنشا, جامبىل وبلىسىنداعى جارىلىستان 15 ادام قازا تاپقان.
