QR Qorǵanys ministrligi 29 tamyzda Jambyl oblysyndaǵy jarylys bolǵan oq-dári qoimasynda tarsyl dybysy estilgenin, onda úsh áskeri qyzmetshi bolǵanyn rastady, dep habarlaidy "Ult aqparat" vedomstvonyń baspasóz qyzmetine silteme jasap.
«29 tamyz kúni saǵat 12:20-da Jambyl oblysyndaǵy jarylys bolǵan oq-dári qoimasynyń ornynda rasynda da tarsyl dybysy estildi. Bul jóninde dereý resmi aqparat berildi. Sol sátte qoima aýmaǵynda úsh adam bolǵan. Profilaktikalyq maqsatta olar Taraz qalasyndaǵy áskeri gospitalǵa tekserilýge jiberildi. Dárigerler áskerilerdi qarap, esh jaraqat-zaqym tappady. Tekserýden keiin áskeri qyzmetshiler qyzmetine oraldy», - dep túsindirdi Qorǵanys ministrligi.
Qazirgi ýaqytta 26 tamyzda órt pen jarylystar bolǵan áskeri bólimniń ainalasyn tazartý jumystary jalǵasýda.
«Bul sharalar barysynda qaýipsizdik sharalaryn saqtaý máselesine erekshe nazar aýdarylady. Osy jumystardy júrgizýge tartylǵan áskeri qyzmetshiler arnaiy qorǵanysh kostiýmderinde jumys isteidi», - deidi ministrlik.
Esterińizge sala ketsek, 26 tamyzda saǵat shamamen 19:00-de Jambyl oblysynyń Baizaq aýdanynda ornalasqan áskeri bólim qoimalarynyń birinen órt shyǵyp, joiqyn jarylys boldy. Sońǵy málimet boiynsha, Jambyl oblysyndaǵy jarylystan 15 adam qaza tapqan.
