تانىمال اسابا سابىرجاننىڭ توي ٷستٸندە ايتقان بٸر اۋىز سٶزٸ ەلەۋمەتتٸك جەلٸدە قىزۋ تالقىعا تٷسٸپ, كٶپشٸلٸكتٸڭ سىنىنا ۇشىرادى, دەپ حابارلايدى ult.kz.
وقيعا توي بارىسىندا بولعان. اسابا ٶرت سٶندٸرۋ قىزمەتٸندە ەڭبەك ەتەتٸن ازاماتقا اقجارما تٸلەگٸن ارناماق بولىپ, «ٶرتٸڭ كٶپ بولسىن» دەگەن سٶز ايتقان. الايدا بۇل سٶز كٶپشٸلٸكتٸڭ كٶڭٸلٸنەن شىقپاي, ەلەۋمەتتٸك جەلٸلەردە كەڭ تاراپ كەتتٸ. جەلٸ قولدانۋشىلارى مۇنداي ەزٸلدٸ ورىنسىز دەپ باعالاپ, تٸلسٸز جاۋمەن كٷن سايىن كٷرەسٸپ جٷرگەن ماماندىق يەسٸنە مۇنداي تٸلەك ايتۋ جاۋاپسىزدىق ەكەنٸن جازدى.
ارادا كٶپ ۋاقىت ٶتپەي, وسى جاعدايعا بايلانىستى تاعى بٸر بەينەجازبا جارييالاندى. وندا ۆيدەو اۆتورى جاقىندا تەمٸرتاۋ قالاسىنداعى زيراتتاردىڭ بٸرٸندە ٸرٸ ٶرت بولعانىن ەسكە سالدى. ونىڭ ايتۋىنشا, جالىن ٷلكەن اۋماقتى شارپىپ, ٶرت سٶندٸرۋشٸلەر ونى ۇزاق ۋاقىت بويى اۋىزدىقتاۋعا مەجبٷر بولعان.
كەيٸنٸرەك انىقتالعانداي, ٶرت شىققان سول قورىمدا اسابا سابىرجاننىڭ اناسى – كٷمٸس-اي اپا دا جەرلەنگەن.
ۆيدەو اۆتورى تٸلسٸز جاۋدىڭ قاي كەزدە, كٸمنٸڭ باسىنا قايعى ەكەلەتٸنٸن ەشكٸم بٸلمەيتٸنٸن ايتىپ, ايتىلعان سٶزدٸڭ سالماعىنا جاۋاپكەرشٸلٸكپەن قاراۋعا شاقىردى. سونداي-اق ول اسابا سابىرجاننىڭ قوعام الدىندا اشىق تٷردە كەشٸرٸم سۇراۋى ورىندى بولاتىنىن جەتكٸزدٸ.
