«تسيفرلاندىرۋ, عالىم جەنە يننوۆاتسييالار ەسەبٸنەن تەحنولوگييالىق سەرپٸلٸس» ۇلتتىق جوباسى اياسىندا «ۆيرتۋالدى ينفورماتيكا مۇعالٸمٸ» جوباسى قولعا الىندى, دەپ حابارلايدى قازاقپارات.
بۇل تۋرالى قر تسيفرلىق دامۋ, يننوۆاتسييالار جەنە اەروعارىش ٶنەركەسٸبٸ مينيسترٸ باعدات مۋسين ورتالىق كوممۋنيكاتسييالار قىزمەتٸندە ٶتكەن باسپاسٶز مەسليحاتىندا ايتىپ بەردٸ.
«بارشامىزعا بەلگٸلٸ, كەيبٸر اۋدان ورتالىقتارىندا نەمەسە وكرۋگتەردە ينفورماتيكا نەمەسە باعدارلامالاۋ مۇعالٸمدەرٸ جەتٸسپەيدٸ جەنە ولاردىڭ دايىندىق ساپاسى دا كٶڭٸل كٶنشٸتپەيدٸ. سوندىقتان بۇل مەسەلەنٸ شەشۋ ٷشٸن «ينفورماتيكا» جەنە «باعدارلامالاۋ» پەندەرٸ ينتەرنەت ارقىلى وقىتۋعا اناعۇرلىم بەيٸم بولعاندىقتان, شىعىس قازاقستان وبلىسىنداعى 150 مەكتەپتە پيلوت جوبا ٸسكە اسىرىلۋدا. بۇل تەجٸريبە ەلٸمٸزدٸڭ بارلىق ٶڭٸرٸنە تاراتىلادى جەنە بارلىق بالالار تۇرعىلىقتى جەرٸنە قاراماستان ينفورماتيكا جەنە باعدارلامالاۋ بويىنشا ساپالى بٸلٸم الا الادى», - دەدٸ باعدات مۋسين.
مينيستردٸڭ ايتۋىنشا, جالپى IT يندۋستريياسى 3 نەگٸزگٸ ەلەمەنتتەن قۇرالادى, ونىڭ بٸرٸنشٸسٸ – ادامي كاپيتالدى دامىتۋ.
«بٸزدٸڭ سالا ٷشٸن ەڭ ماڭىزدىسى – ادامي كاپيتال. ياعني, باعدارلامالاۋ تٸلدەرٸن بٸلەتٸن نەمەسە اناليتيكا قابٸلەتٸ مەن ماتەماتيكا داعدىسى بار ادامدار كٶبٸرەك بولۋى قاجەت. بۇل سالادا كٶپتەگەن ماماندىقتار بار. سوندىقتان بٸزدٸڭ سالا ٷشٸن نەگٸزگٸ رەسۋرس, نەگٸزگٸ شيكٸزات – ادامي كاپيتال دەپ ايتامىز.
ەكٸنشٸ ەلەمەنت – جوبالار اكسەلەراتسيياسى. ياعني, اكسەلەراتسييا ارقىلى ستارتاپتارعا نەمەسە كەسٸپكەرلەرگە IT سالاسىندا بيزنەس جٷرگٸزۋگە بارىنشا دايىن بولۋ ٷشٸن كٶمەك كٶرسەتۋ. ٷشٸنشٸ ەلەمەنت – قاجەتتٸ قارجىلاندىرۋدى قامتاماسىز ەتۋ. ەگەر وسى 3 بلوك دۇرىس جۇمىس ٸستەسە, پرەزيدەنتتٸڭ 2025 جىلى 50 ميلليون دوللار ەكسپورتقا قول جەتكٸزۋ تۋرالى تاپسىرماسىنا قول جەتكٸزە الامىز», - دەپ تٷسٸندٸردٸ ب. مۋسين.
