قارجى نارىعىن رەتتەۋ جەنە دامىتۋ اگەنتتٸگٸ ۆاكتسينانىڭ جالعان پاسپورتىن جاساۋ فاكتٸلەرٸ بويىنشا 13 ايماقتا سوتقا دەيٸنگٸ 26 ٸستٸ قاراي باستادى. بۇل تۋرالى 6 قىركٷيەكتە ۆەدومستۆوعا سٷيەنگەن Vlast سايتى جازدى.
"قازٸر قارجىنى رەتتەۋ اگەنتتٸگٸ ۆاكتسينانىڭ جالعان پاسپورتىن جاساۋ فاكتٸلەرٸ بويىنشا 13 ايماقتا 26 ٸستٸ قاراي باستادى. 86 ادامعا قىلمىستىق جاۋاپكەرشٸلٸك تٶنٸپ تۇر" دەپ حابارلادى اگەنتتٸكتٸڭ باسپاسٶز قىزمەتٸ.
ۆەدومستۆو مەلٸمەتٸنشە, بٸر فاكت ورالداعى اۋرۋحانالاردىڭ بٸرٸندە تٸركەلگەن. رەسمي اقپاراتقا قاراعاندا, مەديتسينا قىزمەتكەرٸ بٸرنەشە اداممەن استىرتىن كەلٸسٸم جاساسىپ, دەنساۋلىق ساقتاۋ مينيسترلٸگٸنٸڭ "ۆاكتسيناتسييا" اتتى ەلەكتروندى مودۋلٸنە ازاماتتاردىڭ ەكپە العانى جٶنٸندە ٶتٸرٸك بەلگٸ قويعان. سول ٷشٸن اقشا العان. وسىلايشا 15-تەن استام ادامعا جالعان قۇجات ساتىلعان.
ۆەدومستۆونىڭ حابارلاۋىنشا, تاپسىرىس بەرۋشٸلەردٸڭ باسىم بٶلٸگٸ – مەكتەپكە دەيٸنگٸ بٸلٸم مەكەمەلەرٸ مەن ساۋدا ورىندارىنىڭ قىزمەتكەرلەرٸ.
قازاقستاندا ۆاكتسينا پاسپورتى كوروناۆيرۋسقا قارسى ەكپەنٸڭ ەكٸ دوزاسىن العاندارعا بەرٸلەدٸ. بيلٸك تۇرعىنداردى ۆاكتسينا الۋعا مٸندەتتەي باستاعاننان كەيٸن ۆاكتسينانىڭ جالعان پاسپورتى جايلى اقپاراتتار جيٸلەي باستاعان. ۆاكتسينا الماعاندار جۇمىسسىز قالۋى مٷمكٸن. بۇل ەسٸرەسە قىزمەت كٶرسەتۋ سالاسىندا ەڭبەك ەتەتٸندەرگە قاتىستى.
بۇعان دەيٸن ٸشكٸ ٸستەر مينيسترلٸگٸ زاڭنامادا جالعان قۇجات جاساۋ بويىنشا 4 جىلعا دەيٸن تٷرمە جازاسى قاراستىرىلعانىن, ونى پايدالانعاندار 40 كٷنگە دەيٸن قامالۋى مٷمكٸن ەكەنٸن ەسكەرتكەن.
19 ملن حالقى بار قازاقستاندا 5,6 ملن ادام ۆاكتسينانىڭ تولىق دوزاسىن العان. ولاردىڭ قانشاسى جالعان پاسپورت پايدالاناتىنى بەلگٸسٸز.
