Qarjy naryǵyn retteý jáne damytý agenttigi vaktsinanyń jalǵan pasportyn jasaý faktileri boiynsha 13 aimaqta sotqa deiingi 26 isti qarai bastady. Bul týraly 6 qyrkúiekte vedomstvoǵa súiengen Vlast saity jazdy.
"Qazir Qarjyny retteý agenttigi vaktsinanyń jalǵan pasportyn jasaý faktileri boiynsha 13 aimaqta 26 isti qarai bastady. 86 adamǵa qylmystyq jaýapkershilik tónip tur" dep habarlady agenttiktiń baspasóz qyzmeti.
Vedomstvo málimetinshe, bir fakt Oraldaǵy aýrýhanalardyń birinde tirkelgen. Resmi aqparatqa qaraǵanda, meditsina qyzmetkeri birneshe adammen astyrtyn kelisim jasasyp, densaýlyq saqtaý ministrliginiń "Vaktsinatsiia" atty elektrondy modýline azamattardyń ekpe alǵany jóninde ótirik belgi qoiǵan. Sol úshin aqsha alǵan. Osylaisha 15-ten astam adamǵa jalǵan qujat satylǵan.
Vedomstvonyń habarlaýynsha, tapsyrys berýshilerdiń basym bóligi – mektepke deiingi bilim mekemeleri men saýda oryndarynyń qyzmetkerleri.
Qazaqstanda vaktsina pasporty koronavirýsqa qarsy ekpeniń eki dozasyn alǵandarǵa beriledi. Bilik turǵyndardy vaktsina alýǵa mindettei bastaǵannan keiin vaktsinanyń jalǵan pasporty jaily aqparattar jiilei bastaǵan. Vaktsina almaǵandar jumyssyz qalýy múmkin. Bul ásirese qyzmet kórsetý salasynda eńbek etetinderge qatysty.
Buǵan deiin ishki ister ministrligi zańnamada jalǵan qujat jasaý boiynsha 4 jylǵa deiin túrme jazasy qarastyrylǵanyn, ony paidalanǵandar 40 kúnge deiin qamalýy múmkin ekenin eskertken.
19 mln halqy bar Qazaqstanda 5,6 mln adam vaktsinanyń tolyq dozasyn alǵan. Olardyń qanshasy jalǵan pasport paidalanatyny belgisiz.
