دەنساۋلىق ساقتاۋ مينيسترٸ الەكسەي تسوي قازاقستاندىقتاردى جاڭا ۆاكتسينانى كٷتپەي, ەلدە بار ەكپەلەردٸ سالدىرا بەرۋگە شاقىردى, دەپ حابارلايدى Sputnik قازاقستان.
ايتا كەتەرٸ, بيىل كٷزگە تامان قازاقستانعا Pfizer ۆاكتسيناسىن جەتكٸزۋ جوسپارلانىپ وتىر. مينيستردٸڭ ايتۋىنشا, بٷگٸندە كەلٸسسٶزدەر اياقتالۋعا جاقىن. الايدا تسوي جاڭا ۆاكتسينانى كٷتپەۋ كەرەك دەپ وتىر.
"جاعداي ۋشىعىپ كەتتٸ, قيىن جاعداي بولىپ تۇر. كٷن سايىن ينفەكتسييا جۇقتىراتىندار سانى ارتىپ كەلەدٸ. ٶكٸنٸشكە قاراي, ازاماتتارىمىز قايتىس بولىپ جاتىر. ولاردىڭ بارلىعى – ەكپە الماعاندار. بٸز جانساقتاۋ بٶلٸمدەرٸن ارالاعاندا پاتسيەنتتەرمەن سٶيلەسەمٸز. ولار اۋرۋدى جۇقتىرعانعا دەيٸن ۆاكتسينا الماعانىنا ٶكٸنەدٸ", - دەدٸ تسوي ورتالىق كوممۋنيكاتسييالار قىزمەتٸندە ٶتكەن ونلاين بريفينگتە.
وسى ورايدا مينيستر ەكپە سالدىرعان ادامدار كوروناۆيرۋس جۇقتىرسا دا, جەڭٸل اۋراتىنىن, بٸرەن-سارانى عانا ورتاشا اۋىر جاعدايدا تٷسەتٸنٸن ەرەكشە اتاپ ٶتتٸ. سوندىقتان قازاقستاندا بار ۆاكتسينالاردى سالدىرعان ادام اۋىر جاعدايعا تٷسپەيدٸ.
"ۆاكتسينا سالدىرعان ادامدار امان قالىپ جاتادى. مٸنە, بۇل – باستى مەسەلە. سوندىقتان پوپۋليستٸك ۇراندارعا سەنبەڭٸزدەر. ۆاكتسينا قابىلداڭىزدار. ونداي مٷمكٸندٸك بەرٸندە جوق. كٶرشٸلەردٸ قاراڭىزدار. ولار قازاقستانداعى ۆاكتسينانىڭ قانشالىقتى قولجەتٸمدٸ ەكەنٸن كٶرگەندە كەدٸمگٸدەي قىزعانىشپەن قارايدى. سەبەبٸ بٸزدە كەز كەلگەن ادام ۆاكتسينا سالدىرا الادى. جاڭا ۆاكتسينا دا كەلەدٸ. ونى دا سالاسىزدار", - دەپ اتاپ كٶرسەتتٸ تسوي.
ال دەنساۋلىق ساقتاۋ ۆيتسە-مينيسترٸ اجار عينييات شەتەلدەگٸ ستاتيستيكانى مىسالعا كەلتٸردٸ. ونىڭ ايتۋىنشا, ەۋروپا ەلدەرٸندە ۆاكتسينادان كەيٸن كوروناۆيرۋستى جۇقتىرۋ جاعدايى از ەمەس. الايدا ادامداردىڭ كٶبٸسٸ ەكپە سالعاندىقتان, ٶلٸم كٶرسەتكٸشٸ قازاقستانعا قاراعاندا تٶمەن بولىپ تۇر.
"مىسالى, ۇلىبريتانييادا 60 ميلليون ادام ۆاكتسينانىڭ بٸرٸنشٸ كومپونەنتٸن سالدىردى. ال تولىق ۆاكتسينالاۋدان 45 ميلليون ادام ٶتتٸ. ول جاقتا دا ۆاكتسينا سالدىرعان ادامدار اۋىرىپ جاتادى. كٷنٸنە 48 مىڭ ادام ۆيرۋس جۇقتىرادى. بٸراق قايتىس بولعاندار سانى ٶتە از. بٸر تەۋلٸكتە 63 ادام", - دەپ اتاپ كٶرسەتتٸ عينييات.
ونىڭ ايتۋىنشا, يزرايلدە حالىقتىڭ 80 پروتسەنتٸ, تٸپتٸ, بالالار دا ۆاكتسينالاۋدان ٶتتٸ. سونىڭ ارقاسىندا كٷنٸنە كوروناۆيرۋستان ٷش-اق ادام قايتىس بولادى. ولاردىڭ دەنٸ – ونكولوگييالىق اۋرۋى بار ناۋقاستار.
قازاقستاندا سوڭعى بٸر تەۋلٸكتٸڭ ٸشٸندە كوروناۆيرۋس پەن كوۆيدتٸك پنەۆمونييادان 74 ادام قايتىس بولعان.
