Densaýlyq saqtaý ministri Aleksei Tsoi qazaqstandyqtardy jańa vaktsinany kútpei, elde bar ekpelerdi saldyra berýge shaqyrdy, dep habarlaidy Sputnik Qazaqstan.
Aita keteri, biyl kúzge taman Qazaqstanǵa Pfizer vaktsinasyn jetkizý josparlanyp otyr. Ministrdiń aitýynsha, búginde kelissózder aiaqtalýǵa jaqyn. Alaida Tsoi jańa vaktsinany kútpeý kerek dep otyr.
"Jaǵdai ýshyǵyp ketti, qiyn jaǵdai bolyp tur. Kún saiyn infektsiia juqtyratyndar sany artyp keledi. Ókinishke qarai, azamattarymyz qaitys bolyp jatyr. Olardyń barlyǵy – ekpe almaǵandar. Biz jansaqtaý bólimderin aralaǵanda patsienttermen sóilesemiz. Olar aýrýdy juqtyrǵanǵa deiin vaktsina almaǵanyna ókinedi", - dedi Tsoi ortalyq kommýnikatsiialar qyzmetinde ótken onlain brifingte.
Osy oraida ministr ekpe saldyrǵan adamdar koronavirýs juqtyrsa da, jeńil aýratynyn, biren-sarany ǵana ortasha aýyr jaǵdaida túsetinin erekshe atap ótti. Sondyqtan Qazaqstanda bar vaktsinalardy saldyrǵan adam aýyr jaǵdaiǵa túspeidi.
"Vaktsina saldyrǵan adamdar aman qalyp jatady. Mine, bul – basty másele. Sondyqtan popýlistik urandarǵa senbeńizder. Vaktsina qabyldańyzdar. Ondai múmkindik bárinde joq. Kórshilerdi qarańyzdar. Olar Qazaqstandaǵy vaktsinanyń qanshalyqty qoljetimdi ekenin kórgende kádimgidei qyzǵanyshpen qaraidy. Sebebi bizde kez kelgen adam vaktsina saldyra alady. Jańa vaktsina da keledi. Ony da salasyzdar", - dep atap kórsetti Tsoi.
Al densaýlyq saqtaý vitse-ministri Ajar Ǵiniiat sheteldegi statistikany mysalǵa keltirdi. Onyń aitýynsha, Eýropa elderinde vaktsinadan keiin koronavirýsty juqtyrý jaǵdaiy az emes. Alaida adamdardyń kóbisi ekpe salǵandyqtan, ólim kórsetkishi Qazaqstanǵa qaraǵanda tómen bolyp tur.
"Mysaly, Ulybritaniiada 60 million adam vaktsinanyń birinshi komponentin saldyrdy. Al tolyq vaktsinalaýdan 45 million adam ótti. Ol jaqta da vaktsina saldyrǵan adamdar aýyryp jatady. Kúnine 48 myń adam virýs juqtyrady. Biraq qaitys bolǵandar sany óte az. Bir táýlikte 63 adam", - dep atap kórsetti Ǵiniiat.
Onyń aitýynsha, Izrailde halyqtyń 80 protsenti, tipti, balalar da vaktsinalaýdan ótti. Sonyń arqasynda kúnine koronavirýstan úsh-aq adam qaitys bolady. Olardyń deni – onkologiialyq aýrýy bar naýqastar.
Qazaqstanda sońǵy bir táýliktiń ishinde koronavirýs pen kovidtik pnevmoniiadan 74 adam qaitys bolǵan.
