ٷندٸستاندا كوروناۆيرۋس جۇقتىرعاندار 20 ميلليوننان استى. دەنساۋلىق ساقتاۋ مينيسترلٸگٸ بٸر كٷندە 357 مىڭنان استام ادامنان كوروناۆيرۋس انىقتاعان. ەلدە اۋرۋحانالاردا ورىن جوق, دەرٸ-دەرمەك پەن وتتەگٸ اپپاراتتارى تاپشى.
سوڭعى ٷش ايدا كوروناۆيرۋس جۇقتىرعاندار ەكٸ ەسەگە كٶبەيگەن, ادام ٶلٸمٸ 220 مىڭنان اسقان.
ٶزگە ەلدەرگە قاراعاندا ٷندٸستاندا ۆيرۋس ٶتە جىلدام تاراپ جاتىر. 1 سەۋٸردە ەلدە 65 مىڭنان استام ناۋقاس تٸركەلسە, كەيٸنگٸ كٷندەرٸ 370 مىڭنان استام ناۋقاس انىقتالىپ جٷر. ادام ٶلٸمٸ كٶرسەتكٸشٸ مامىردا 3 مىڭعا جەتكەن.
ٸندەتتٸڭ ٶرشۋٸنە كوروناۆيرۋستىڭ تەز جۇعاتىن تٷرٸنٸڭ تارالۋى سەبەپ دەپ ايتىلادى, بۇعان قوسا دٸني فەستيۆالدار مەن ساياسي ميتينگٸلەر كەزٸندە ادامداردىڭ توپتاسىپ جينالۋىنا رۇقسات بەرگەن ٷكٸمەت شەشٸمٸ دە تٷرتكٸ بولعان.
ساراپشىلار ٷندٸستاندا كوروناۆيرۋس جۇقتىرعاندار مەن قايتىس بولعاندار رەسمي ستاتيستيكاعا قاراعاندا ەلدەقايدا كٶپ دەپ سانايدى. ەلدە اۋرۋحانالار تولىپ كەتكەن, دەرٸگەرلەر پاتسيەنتتەردٸ ورىن جوق دەپ قايتارىپ جاتىر. ٸندەت دەنساۋلىق ساقتاۋ جٷيەسٸنٸڭ كەمشٸلٸكتەرٸن كٶرسەتكەن.
امەريكانىڭ جوعارى لاۋازىمدى شەنەۋنٸگٸ الداعى اپتالاردا 1,4 ملرد تۇرعىنى بار ەلدە ٷكٸمەت دۇرىس قادام جاساسا دا, جاعداي "ٶتە قورقىنىشتى" بولادى دەپ ەسكەرتتٸ.
