فوتو: Pexels.com
قازاقستان ۇلتتىق بانكٸ 2025 جىلدىڭ 4 جەلتوقسانىندا ۆاليۋتالىق نارىققا قاتىستى اقپاراتتىق حابارلاما تاراتىپ, سوڭعى ۋاقىتتا اقش دوللارىنا شاققانداعى تەڭگە باعامىنىڭ ايتارلىقتاي نىعايۋىنىڭ سەبەپتەرٸن تٷسٸندٸردٸ, دەپ حابارلايدى Ult.kz.
قارجى رەتتەۋشٸسٸنٸڭ دەرەگٸنشە, قازان ايىنان بەرٸ تەڭگە بٸر دوللار ٷشٸن 499–500 تەڭگە ارالىعىندا ساۋدالانىپ, شامامەن 9%-عا كٷشەيگەن. بۇل ٷردٸس سىرتقى نارىقتاعى قولايلى احۋال مەن ەلدەگٸ ماكروەكونوميكالىق ساياساتتىڭ تۇراقتىلىعىمەن بايلانىستى.
ۇلتتىق بانك مۇنايدىڭ ەلەمدٸك باعاسى باررەلٸنە 60 دوللاردان جوعارى دەڭگەيدە ساقتالىپ وتىرعانىن اتاپ ٶتتٸ. سونىمەن قاتار اقش فەدەرالدى رەزەرۆ جٷيەسٸنٸڭ مٶلشەرلەمەنٸ تٶمەندەتۋ تۋرالى شەشٸمدەرٸ جاھاندىق دوللار يندەكسٸنٸڭ 8,3%-عا ەلسٸرەۋٸنە, ال دامۋشى نارىقتار ۆاليۋتالارىنىڭ 8,3%-عا نىعايۋىنا ىقپال ەتكەن. وسى فاكتورلار قازاقستان اكتيۆتەرٸنە حالىقارالىق ينۆەستورلاردىڭ قىزىعۋشىلىعىن ارتتىردى.
بۇعان قوسا ٷكٸمەت, ۇلتتىق بانك جەنە قارجى نارىعىن رەتتەۋ اگەنتتٸگٸ ٸسكە اسىرىپ جاتقان 2026–2028 جىلدارعا ارنالعان ماكروەكونوميكانى تۇراقتاندىرۋ جەنە حالىق ەل-اۋقاتىن ارتتىرۋ جٶنٸندەگٸ بٸرلەسكەن ٸس-قيمىل باعدارلاماسى تەڭگەنٸڭ تۇراقتىلىعىن كٷشەيتە تٷستٸ. باعدارلاما سۇرانىس پەن ۇسىنىس تەڭگەرٸمٸن قالپىنا كەلتٸرۋگە, بيۋدجەت شىعىستارىنىڭ تيٸمدٸلٸگٸن ارتتىرۋعا, ينفلياتسييانى تٶمەندەتۋگە جەنە ەكونوميكالىق ٶسٸمگە جاعداي جاساۋعا باعىتتالعان.
«اقشا-كرەديت ساياساتىنىڭ دەيەكتٸلٸگٸ نارىق قاتىسۋشىلارىنىڭ سەنٸمٸن ارتتىردى. قالىپتى قاتاڭ ساياسات ينفلياتسييالىق كٷتۋلەردٸڭ تٶمەندەۋٸنە جەنە تەڭگەمەن قۇرالداردىڭ ناقتى كٸرٸستٸلٸگٸنٸڭ ٶسۋٸنە ەكەلدٸ. بۇل وتاندىق اكتيۆتەردٸڭ, سونىڭ ٸشٸندە بەيرەزيدەنتتەر ٷشٸن, تارتىمدىلىعىن كٷشەيتتٸ», — دەپ اتاپ ٶتتٸ ۇلتتىق بانك.
