ۋكراينادا سايلاۋ كوميسسييالارى حاتتامالارىنىڭ 50 پايىزدان استامى سانالعاننان كەيٸن پرەزيدەنتتٸككە كانديدات شوۋمەن ۆلاديمير زەلەنسكيي الدا كەلەدٸ. ول ەلدٸڭ قازٸرگٸ پرەزيدەنتٸ پەتر پوروشەنكودان ەكٸ ەسەگە جۋىق ارتىق داۋىس جيناعان. ساراپشىلار ەكەۋٸ سايلاۋدىڭ ەكٸنشٸ تۋرىنا ٶتكەنٸن ايتادى.
ۋكراينا ورتالىق سايلاۋ كوميسسيياسىنىڭ مەلٸمەتٸنشە, ناۋرىزدىڭ 31-ٸ كٷنٸ ٶتكەن پرەزيدەنت سايلاۋى اياقتالعاننان كەيٸن سايلاۋ كوميسسييالارىنان تٷسكەن حاتتامالاردىڭ جارتىسىنان كٶبٸ سانالعاننان كەيٸن پرەزيدەنتتٸككە كانديدات شوۋمەن ۆلاديمير زەلەنسكيي (30,22 %) الدا كەلەدٸ. ۋكراينانىڭ قازٸرگٸ پرەزيدەنتٸ پەتر پوروشەنكوعا بەرٸلگەن داۋىس سانى ودان ەكٸ ەسەگە جۋىق كەم (16,63 %).
ٷشٸنشٸ ورىندا بۇرىنعى پرەمەر-مينيستر, "باتكيۆششينا" پارتيياسىنىڭ ليدەرٸ يۋلييا تيموشەنكو (13,08%) تۇر.
"وپپوزيتسييالىق بلوك" تەڭتٶراعاسى يۋريي بويكو (11,49% ) تٶرتٸنشٸ ورىندا. وعان كٶبٸنە ۋكراينانىڭ شىعىسىنداعى دونەتسك جەنە لۋگانسك وبلىستارىندا تۇراتىن سايلاۋشىلار قولداۋ بٸلدٸرگەن.
اناتوليي گريتسەنكو, يگور سمەشكو مەن ولەگ لياشكونى قولداپ بەرٸلگەن داۋىس سانى 10 پايىزعا جەتپەيدٸ. ساياساتكەر الەكساندر ۆيلكۋل 4 پايىزعا جۋىق, ۇلتشىل كوشۋلينسكيي – 1,5 پايىزدان سەل ارتىق داۋىس جيعان. ٶزگە كانديداتتاردىڭ العان داۋىسى ەزٸرگە 1 پايىزعا جەتكەن جوق.
ورتالىق سايلاۋ كوميسسيياسى جارييالاعان سايلاۋدىڭ الدىن الا قورىتىندىسى جەكسەنبٸدە سايلاۋ ۋچاسكەلەرٸندە داۋىس بەرۋ اياقتالا سالا شىعارىلعان ۇلتتىق ەكزيت-پول قورىتىندىسىنداعى كٶرسەتكٸشكە ۇقساس. ول بويىنشا, ۆلاديمير زەلەنسكيي 30,6%, پەتر پوروشەنكو – 17,8%, ال يۋلييا تيموشەنكو – 14,2% داۋىس جيعان. يۋريي بويكوعا سايلاۋشىلاردىڭ 9,7% قولداۋ بٸلدٸردٸ دەپ كٶرسەتٸلگەن ەكزيت-پول مەلٸمەتٸندە.
"بٷگٸن جەمقورلىقسىز جاڭا ٶمٸر باستالادى. بۇل ۇلى جەڭٸسكە قاراي العاشقى قادام" دەپ مەلٸمدەدٸ 41 جاستاعى ۆلاديمير زەلەنسكيي سايلاۋ ۋچاسكەلەرٸندە داۋىس بەرۋ اياقتالعاننان كەيٸن كيەۆتەگٸ شتابىندا.
ٶزٸن قالاي سەزٸنەتٸنٸن سۇراعان جۋرناليستەرگە ول "ازداپ قوبالجيتىنىن" ايتقان.
"مەن تٸرٸ پەندەمٸن. زايىبىم مەن دوستارىمنىڭ قولداۋى جٷگٸمدٸ جەڭٸلدەتتٸ. بۇل اسا زور جاۋاپكەرشٸلٸك. جاۋاپكەرشٸلٸكتٸڭ نە ەكەنٸن تٷسٸنەمٸن, سوندىقتان مەن... ٶزٸمدٸ جاقسى سەزٸنەمٸن" دەدٸ ول.
53 جاستاعى پەتر پوروشەنكو ەكزيت-پول قورىتىندىسى قازٸرگٸ بيلٸككە "ساباق" بولعانىن ايتتى.
"بۇل مەن ٷشٸن جەنە تۇتاس بيلٸككە ٷلكەن ساباق بولدى. قاتەلٸكتەردەن قورىتىندى شىعارىپ, جۇمىس ٸستەۋمٸزگە سەبەپ بۇل" دەدٸ ول كيەۆتەگٸ سايلاۋ شتابىندا سٶيلەگەن سٶزٸندە.
پوروشەنكو بەسەكەلەسٸ زەلەنسكييدٸ پرەزيدەنت بولۋعا, ەسٸرەسە رەسەي پرەزيدەنتٸ ۆلاديمير پۋتينگە قارسى تۇرۋعا لايىق ەمەس سيپاتتادى.
پۋتين "ۋكراينا پرەزيدەنتٸنٸڭ ىرجالاقتاۋدى عانا بٸلەتٸن ەلجۋاز, كٶنبٸس, تەجٸريبەسٸز, ساياسي جٸگەرٸ جوق بولعانىن قالايدى. راسىمەن وعان وسىنداي مٷمكٸندٸك بەرەمٸز بە?" دەدٸ پوروشەنكو.
"دوستارىم, بٷگٸن سٸزدەر - ۋكرايندار, بٸز – ۋكرايندار [ۋكرايناداعى سايلاۋدا] بٸرٸنشٸ تۋردا رەسەيدٸڭ ستسەناريٸن كٷيرەتتٸك, ٶيتكەنٸ ولار پوروشەنكونىڭ ەكٸنشٸ تۋرعا ٶتكەنٸن قالامادى. ونىسى تولىق ٸسكە اسپادى" دەدٸ ول.
پوروشەنكو ۋكراينانى ەۋروپا وداعى مەن ناتو ۇيىمىنا جاقىنداتىپ, سونىمەن بٸرگە ەلدٸڭ شىعىسىنداعى رەسەيدٸڭ قولداۋىنا سٷيەنگەن سەپاراتيستەرگە قارسى كٷرەسٸپ جاتقان قارۋلى كٷشتەردٸ نىعايتۋعا تىرىسادى.
ول ۋكراين جاستارىنىڭ "نارازى" داۋىسىن ەستٸگەنٸن ايتىپ, ەكٸنشٸ تۋردا ٶزٸن قولداۋعا شاقىردى.
"سٸزدەر ەلدەگٸ ٶزگەرٸستٸ كٶرٸپ وتىرسىزدار, بٸراق ولاردىڭ بۇدان دا جىلدام, زور ەرٸ ساپالى بولعانىن قالايسىزدار. سٸزدەردٸڭ نارازىلىقتارىڭىزدىڭ سەبەبٸن تٷسٸندٸم" دەدٸ پوروشەنكو.
ۋكراينادا 2004-2005 جىلدارى بولعان قىزعىلت-سارى رەۆوليۋتسييا ليدەرلەرٸنٸڭ بٸرٸ 58 جاستاعى يۋلييا تيموشەنكونىڭ سايلاۋ شتابى ٶزدەرٸ جٷرگٸزگەن ەسەپ بويىنشا, حاتتامالاردىڭ ٷشتەن ەكٸسٸ سانالعاننان كەيٸن تيموشەنكو 16,1% داۋىس جيناپ, پوروشەنكونى باسىپ وزدى دەپ مەلٸمدەدٸ. جەكسەنبٸدە داۋىس بەرۋ اياقتالعاننان كەيٸن تيموشەنكو ٶز جاقتاستارىن سايلاۋ ۋچاسكەلەرٸنە بارىپ, "داۋىستىڭ ەدٸل سانالۋىن قامتاماسىز ەتۋگە" شاقىردى. سايلاۋالدى كامپانييا كەزٸندە پوروشەنكو بيلٸگٸن سىناپ پوپۋليستٸك مەلٸمدەمەلەر جاساعان تيموشەنكو پرەزيدەنت بولىپ سايلانعان جاعدايدا بٸر ايدىڭ ٸشٸندە تۇرعىندارعا گاز باعاسىن ەكٸ ەسەگە ازايتىپ, زەينەتاقىنى كٷرت كٶبەيتۋگە ۋەدە بەرگەن.
ناۋرىزدىڭ 31-ٸ كٷنٸ ۋكراينا پرەزيدەنتٸ سايلاۋىنا داۋىس بەرۋگە رەسمي تٸركەلگەن سايلاۋشىلاردىڭ 63,52% قاتىسقان. 2014 جىلى ٶتكەن پرەزيدەنت سايلاۋى كەزٸندە بۇل كٶرسەتكٸش 60,29% بولعان ەدٸ.
ۋكراينا پرەزيدەنتٸ سايلاۋىنىڭ نەتيجەسٸ سەۋٸردٸڭ 10-ىنا دەيٸن جارييالانۋى تيٸس.
ۋكراينا زاڭىنا سەيكەس, سايلاۋشىلاردىڭ جارتىسىنان استامىنىڭ قولداۋىنا يە بولعان كانديدات جەڭٸسكە جەتەدٸ. ال ەگەر ٷمٸتكەرلەردٸڭ ەشبٸرٸ جەڭٸسكە قاجەتتٸ داۋىس جيناي الماسا, العاشقى تۋردا ٶزگە بەسەكەلەستەرٸنەن ارتىق داۋىس العان ەكٸ كانديدات سەۋٸردٸڭ 21-ٸ كٷنٸ قايتادان سايلاۋعا تٷسٸپ, ەڭ كٶپ داۋىس العانى جەڭٸمپاز دەپ سانالادى.
سايلاۋدىڭ تٷپكٸلٸكتٸ قورىتىندىسى مامىردىڭ 1-ٸ دەيٸن بەلگٸلٸ بولماق.
ۋكراينادا وسىمەن جەتٸنشٸ رەت پرەزيدەنت سايلاۋى ٶتٸپ جاتىر. بۇل جولعى سايلاۋعا پرەزيدەنتتٸكتەن ٷمٸتكەر 39 ازامات تٷستٸ. بۇل - بۇرىن-سوڭدى بولماعان كٶرسەتكٸش.
ۋكراينا پرەزيدەنتٸ بەس جىل مەرزٸمگە سايلانادى.
ۋكراينا ورتالىق سايلاۋ كوميسسيياسى پرەزيدەنت سايلاۋىنا 17 مەملەكەت پەن 19 حالىقارالىق ۇيىمنان كەلگەن 2400-گە جۋىق حالىقارالىق باقىلاۋشىنى تٸركەگەنٸن حابارلادى. ولاردىڭ اراسىندا رەسەي ازاماتتارى جوق. ۋكراينا پارلامەنتٸ بۇعان دەيٸن رەسەيدٸ "اگرەسسور مەملەكەت" رەتٸندە تانىپ, سايلاۋدى باقىلاۋ مٷمكٸندٸگٸنەن ايىرعان.
بۇعان دەيٸن كيەۆ رەسەي فەدەراتسيياسىندا سايلاۋ ۋچاسكەلەرٸ دە بولمايتىندىقتان رەسەيدٸڭ نوۆوسيبيرسك جەنە سۆەردلوۆ وبلىستارىندا تۇراتىن ۋكراينا ازاماتتارىنا قازاقستان استاناسى نۇر-سۇلتان قالاسىنداعى ۋكراينا ەلشٸلٸگٸندە داۋىس بەرۋگە بولاتىنى تۋرالى حابارلاعان ەدٸ. قازاقستان بويىنشا قۇرىلعان وسى جالعىز سايلاۋ ۋچاسكەسٸنٸڭ تٶراعاسى ۆيتاليي لوكتەۆتٸڭ ايتۋىنشا, قازاقستاندا - مىڭنان استام, ال رەسەي بويىنشا ٷش مىڭنان استام سايلاۋشى تٸركەلگەن.
