ۇبت كەزٸندە زاڭسىز ەرەكەت جاساعان تٷلەكتەر جىل بويى تەستٸلەۋ تاپسىرۋ مٷمكٸندٸگٸنەن ايىرىلادى. بۇل تۋرالى «Birge oqý» جوباسىنىڭ ارنالارى ارقىلى ٶتكەن تٸكەلەي ەفيردە «ۇلتتىق تەستٸلەۋ ورتالىعى» رمقك ديرەكتورىنىڭ ورىنباسارى ناۋجان ديداربەكوۆا مەلٸم ەتتٸ, دەپ حابارلايدى قازاقپارات.
«بيىل ۇلتتىق بٸرىڭعاي تەستٸلەۋدٸ ٶتكٸزۋ پروتسەسٸنە ٶزگەرٸستەر ەنگٸزٸلٸپ وتىر. وسى ورايدا زاڭسىز ەرەكەتتەرگە تالاپتار كٷشەيتٸلدٸ دەپ ايتساق بولادى. مىسالى, بٸزدە بۇرىن تىيىم سالىنعان زات اۋديتورييادان تابىلعان جاعدايدا عانا اكت جاسالىپ, وقۋشى تەستٸلەۋدەن شىعارىلاتىن بولاتىن. ال بيىلعى ۇبت-نى ٶتكٸزۋ قاعيداتىنا توقتالساق, تەستٸلەۋدە عيماراتتاعى مەتالدى ٸزدەيتٸن قۇرىلعى ايماعىنا دەيٸن تەستٸلەنۋشٸ بالادان تىيىم سالىناتىن زات تابىلعان جاعدايدا, وندا تيٸستٸ اكت جاسالىپ, تٷلەك تەستٸلەۋگە جٸبەرٸلمەيدٸ. بۇل تۇرعىدا بيىل ۇبت تاپسىرۋ مٷمكٸندٸگٸنەن ايىرىلادى», - دەپ تٷسٸندٸردٸ ن. ديداربەكوۆا.
سونىمەن قاتار اۋديتورييادا تىيىم سالىنعان زاتپەن ۇستالعان تٷلەكتٸڭ دە تەستٸلەۋ نەتيجەسٸ جويىلىپ, وسى جىلى ۇبت تاپسىرا المايتىن بولادى.
بۇدان بٶلەك ن. ديداربەكوۆا كەيبٸر تالاپكەرلەر ٶزٸنٸڭ ورنىنا باسقالاردى تەستٸلەۋگە جٸبەرٸپ جاتاتىنىن, بۇل زاڭسىز ەرەكەت جاساعاندارعا تيٸستٸ جازا قاراستىرىلعانىن ايتتى.
«مۇنداي جاعداي بٶگدە ادامدى ٶزٸنٸڭ ورنىنا كٸرگٸزۋگە تالپىنعان تٷلەككە دە قاتىستى. ەندٸ بۇل ەرەكەت ٷشٸن اتالعان ادام جىل بويى ەمتيحان تاپسىرا المايدى», - دەدٸ ۇلتتىق تەستٸلەۋ ورتالىعىنىڭ ٶكٸلٸ.
ماماننىڭ پايىمىنشا, مۇنداي شارالار تالاپكەرلەر اراسىندا زاڭسىز ەرەكەتتەردٸڭ جولىن كەسەدٸ.
